Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 403 Hüküm no: 345 Orijinal metin no: [114a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Darbhane yakınında Haremeyn Evkafı’ndan Müderris Hamamı’nın Kaytas Bey b. Abdülmennan’a kiralandığı Mahmiye-i Kostantıniyye’de vâki‘ Haremeyn-i Muhteremeyn Evkāf-ı şerîfelerine bi’l-fi‘il mütevellî olan ebnâ-i sipâhiyândan Hüseyin Bey b. Memi nâm cündî meclis-i şer‘-i şerîfde sâhibü hâze’l-kitâb ebnâ-i sipâhiyândan fahrü’l-emâsil ve’l-akrân Kaytas Bey b. Abdülmennan mahzarında ikrâr ve takrîr-i kelâm kılıp evkāf-ı şerîfe-i mezbûreden mahmiye-i mezbûrede Darbhâne kurbünde vâki‘ vâkıfına intimâyile tahdîd ve tavsîfden müstağnî olan Müderris hamâmı demekle ma‘rûf hamâmın bir senesi yedi bin akçeye olmak üzere bilâ-meremmet Nesimi b. Budak nâm kimesne istîcâr edip hâlâ müddet-i icâre tamâm olup merkūm Nesimi dahi hüsn-i ihtiyâr ve tayyib-i hâtır ile fâriğ olup hamâm-ı merkūm tâlibîne arz olunup duvar ve kazgan ve sakf meremmetinden gayri vâki‘ olacak meremmât ile sekiz bin akçede merkūm Kaytas Bey üzerinde karâr edip ziyâde ile bir ferd dahi tâlib olmayıp zü’l-yed olan merkūm Nesimi kabûl etmeyip hîn-i tasarrufunda vakfa merremmât husûsunda nice gadri [gayreti] dahi vâki‘ olup mezkûr Kaytas icâresinde ziyâde ve meremmeti fazla olmağla evkāf-ı şerîfe-i mezbûreye her vechile sa‘yi zuhûra gelmeğin işbu isneyn ve selâsîn ve elf senesinde vâki‘ Recebü’l-mürecceb’in gurresinden bir sene tamâmına değin mezkûr Kaytas Bey sâlifü’z-zikr hamâmı minvâl-i meşrûh üzere duvar ve kazgan ve sakfdan gayri meremmâtı ile meblağ-ı merkūm sekiz bin akçeye tevliyetim hasebi ile îcâr ol dahi minvâl-i meşrûh üzere istîcâr ve kabûl etti dedikde mütevellî-i mezbûr Hüseyin Bey’in minvâl-i meşrûh üzere sudûr eden kelimâtını müste’cir-i mesfûr Kaytas Bey vicâhen tasdîk ve şifâhen tahkīk edicek mâ-hüve’l-vâkı‘ bi’t-taleb kayd olundu. Tahrîren fi’t-târîhi’l-mezbûr. Şühûdü’l-hâl: İbrahim b. Mirzâ Yiğitbaşı-yı hammâmiyân, Mehmed Çelebi b. Abdülgani, Mehmed Çelebi b. Musa el-bevvâb, Mustafa b. Lutfullah el-bevvâbü’s-sultânî, Hasan Çelebi b. Hüseyin el-mi‘mâr.