Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 404 Hüküm no: 346 Orijinal metin no: [114a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Muhyiddin mahallesinde Haremeyn Evkafı’ndan olan evi kiralayan Hüseyin Ağa b. Memi’nin hüccet talebi Sâhibü hâze’l-kitâb Yusuf b. Abdülmennan meclis-i şer‘-i şerîfe hâzır olup takrîr-i kelâm ve ta‘bîr ani’l-merâm kılıp <> Medîne-i Münevvere Evkāfı’ndan olup Edirne kapısı dâhilinde Hoca Muhyiddin mahallesinde vâki‘ bir tarafı Mehmed Çavuş mülkü ve bir tarafı Hüseyin Beşe b. Hasan er-râcil mülkü ve iki tarafı tarîk-i âm ile mahdûd olan menzili icâre-i mu‘accel ve müeccele ile mutasarrıfe olan Râziye bt. Hasan nâm hatun fevt olup evlâd-ı kalmamağla cânib-i evkāf-ı mezbûreden âhara îcâr olunmak lâzım geldikde bi’l-fi‘il evkāf-ı mezbûre mütevellîsi olan ebnâ-i sipâhiyândan fahrü’l-akrân Hüseyin Ağa b. Memi menzil-i mezbûru istîcâr murâd eden tâlibîne arz edip âhirü’l-emr iki bin akçe icâre-i mu‘accele ve beher mâh otuzar akçe ücret-i müeccele ile benim üzerimde karâr edip âhirü’l-emr ziyâde ile tâlib bulunmamağla mütevellî-i mezbûr iki bin akçe benden icâre-i mu‘accele aldıkdan sonra târîh-i kitâb şehri gurresinden beher mâh otuzar akçe ücret-i müeccele ile bana îcâr edip ben dahi vech-i meşrûh üzere istîcâr ettiğimden sonra tasarrufu için yedime temessük def‘ ve i‘tâ etmişdir. Nazar olunup mûcebince savb-ı şer‘-i şerîfden elime hüccet-i şer‘iyye verilmek matlûbumdur deyu mütevellî-i mezbûrun imzâsıyla mümzâ ve hatemi ile mahtûm ve isneyn ve selâsîn ve elf senesi Şa‘bânü’l-mu‘azzamı’nın evâili ile müverrah temessükünü ibrâz edip nazar olundukda min-külli’l-vücûh merkūm Yusuf’un takrîrine mutâbık bulunmağın mûcebince işbu hurûf ber-sebîl-i temessük ketb olunup yedi tâlibe def‘ olundu. Tahrîren fi’l-yevmi’l-hâdî aşer min-Şa‘bâni’l-mu‘azzam li-sene isneyn ve selâsîn ve elf. Şühûdü’l-hâl: Mustafa Çelebi b. Şaban el-cündî, Sefer Beşe er-râcil, Abdülkerim ed-dellâl, Abdulbâki, Ömer Çelebi el-cündî, Mustafa Çelebi Kâtib-i vakf-ı mezbûr.