Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 408 Hüküm no: 352 Orijinal metin no: [115a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Azebler mahallesinde Haremeyn Evkafı’ndan olan vakıf evin yarısını kiralayan Derviş Ahmed b. Hüseyin’in hüccet talebi Sâhibü hâze’l-kitâb Derviş Ahmed b. Hüseyin meclis-i şer‘-i şerîfde hâzır olup takrîr-i kelâm ve ta‘bîr ani’l-merâm kılıp Haremeyn-i Şerîfeyn Evkāfı’ndan Dârü’s-saltanati’s-seniyye Kostantıniyyeti’l mahmiye mahallâtından Azebler mahallesinde vâki‘ bir tarafı Sağrıcı Ağa mülkü ve bir tarafı tarîk-i hâs ve bir tarafı Harâçcı Kara Mehmed vakfı ve bir tarafı tarîk-i âm ile mahdûd olan menzil nice müddetden beri <> Müslime Hatun icâre-i mu‘accelesine beher mâh yüz ellişer akçe ücret-i müeccele ile mutasarrıfe olup hâlâ icâre-i mu‘accele ile îcâr olunması evkāf-ı mezbûreye evlâ ve enfa‘ olmağın bi’l-fi‘il evkāf-ı mezbûre mütevellîsi olan ebnâ-i sipâhiyândan Hüseyin Bey b. Memi menzil-i mezbûrun cânib-i garbîsinden nısfını tâlibîn-i müste’cirîne arz edip iki bin akçe icâre-i mu‘accele ve beher mâh beşer akçe ücret-i müeccele ile benim üzerimde karâr edip âhirü’l-emr kimesne bir akçe ve bir habbe ziyâde ile kabûl etmemeğin mütevellî-i mûmâ-ileyh Hüseyin Bey meblağ-ı merkūm iki bin akçe icâre-i mu‘acceleyi benden ahz ve kabz ettikden sonra menzil-i mezbûrun nısfını târîh-i kitâb şehri gurresinden beher mâh yetmiş beş akçeye bana îcâr edip ben dahi vech-i meşrûh üzere istîcâr ettikden sonra tasarruf için elime temessük vermişdir. Nazar olunup cânib-i şer‘-i şerîfden dahi yedime hüccet-i şer‘iyye verilmek matlûbumdur deyu mütevellî-i mezbûrun hatemi ile mahtûm ve imzâsıyla mümzâ ve târîh-i kitâb şehri gurresiyle müverrah temessükünü ibrâz edip nazar olundukda min-külli’l-vücûh kelâm-ı meşrûhuna mutâbık bulunmağın savb-ı şer‘-i şerîfden mûcebince işbu hurûf ber-sebîl-i temessük ketb olunup yed-i tâlibe def‘ olundu. Fî-evâhiri Şevvâli’l-mükerrem li-sene isneyn ve selâsîn ve elf. Şühûdü’l-hâl: Mustafa Ağa b. ( ) Ser-sağrıcıyân, Mehmed Efendi b. Ahmed el-imâm, Sinan Halîfe b. Ali el-imâm, Mustafa b. Sinan el-mülâzım, Osman Dede b. Sinan el-kâtib, Mehmed Dede b. Abdüsselam el-kayyım, Mehmed Çelebi b. Mehmed Serrâc-ı sultânî, Ahmed Dede el-haddâd, Yusuf b. Mustafa el-müezzin, Mehmed b. Abdullah er-râcil, Mustafa Dede b. Ecir, Mahmud b. Mustafa, el-Hâc Murad.