Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 409 Hüküm no: 353 Orijinal metin no: [115a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Gıyaseddin mahallesinde İbrahim Çelebi Vakfı olup Haremeyn Evkafı’na intikal eden ev ve paranın eski mütevellisinden teslim alındığı Mahmiye-i Kostantıniyye’de bi’l-fi‘il <> Haremeyn-i Muhteremeyn Evkāf-ı şerîfelerine mütevellî olan ebnâ-i sipâhiyândan fahrü’l-emâsil ve ve’l-e‘âlî Hüseyin Bey b. Memi meclis-i şer‘-i hatîr-i lâzımü’t-tevkīrde sâhibü hâze’l-kitâb mahmiye mezbûre mahallâtından Hoca Gıyaseddin mahallesi sâkinlerinden Abdülmuttalib Efendi b. İsa mahzarında ikrâr ve takrîr-i kelâm kılıp merhûm İbrahim Çelebi nâm kimesne mahalle-i mezbûrede vâki‘ olan mülk menzilini evvelâ kendi nefsine ba‘dehû zevcesine ve ba‘dehâ utekāsına ba‘dehû Ahmed Efendi nâm kimesneye ba‘dehüm Medîne-i Münevvere fukarâsına vakfedip menzil-i mezkûrun meremmetine dahi kendi mâlından on iki bin akçe vakfedip hâlâ mevkūfün-aleyhimi’l-mezbûrûn münkarız olup menzil-i mezbûr dahi hâlâ Medîne-i Münevvere fukarâsına intikāl etmeğin tevliyet-i mahkiyyem hasebi ile menzil-i mezbûru evkāf-ı mesfûre tarafından zabt edip meblağ-ı mezbûr mütevellî-i sâbık merkūm Abdülmuttalib Efendi yedinden almak lâzım geldikde meblağ-ı mezbûr on iki bin akçeyi dahi mütevellî-i sâbık-ı mezbûr yedinden bi’t-tamâm ve’l-kemâl ahz ve kabz ettim. Ba‘de’l-yevm vâkıf-ı mezbûr İbrahim Çelebi’nin vakfında eğer asl-ı mâldan ve eğer ribhden mezkûr Abdülmuttalib Efendi yedinde ve zimmetinde bir akçe ve bir habbe bâkī kalmadı dedikde mütevellî-i mezbûr Hüseyin Bey’in ikrâr-ı meşrûhun el-mukarru-lehü’l-merkūm Abdülmuttalib Efendi vicâhen tasdîk edicek mâ-hüve’l-vâkı‘ bi’t-taleb ketb olundu. Fî-evâili Zilka‘de li-sene isneyn ve selâsîn ve elf. Şühûdü’l-hâl: Mahmud Efendi b. Ömer el-müderris, Halil Efendi el-müderris, Ali b. Mehmed, Osman Efendi b. Süleyman, el-Hâc Mahmud b. Musa, Ahmed Halîfe b. Ramazan, Ali Efendi b. Hüseyin el-mülâzım, İbrahim Çelebi b. Halil el-müderris, el-Hâc Ali b. Şaban, Mustafa Çelebi b. Durmuş, el-Hâc Hasan.