Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 410 Hüküm no: 354 Orijinal metin no: [115b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’ndan Azebler mahallesinde bulunan evin kiracısı olan Müslime Hatun’un temessük talebi Sâhibü hâze’l-kitâb fahrü’l-muhadderât Müslime Hatun bt. ( ) nâm hatun meclis-i şer‘-i şerîfe hâzır olup <> takrîr-i kelâm ve ta‘bîr ani’l-merâm kılıp Haremeyn-i Muhteremeyn Evkāf-ı şerîfelerinden Dârü’s-saltanati’s-seniyye Kostantıniyyetü’l-mahmiye mahallâtından Kapan-ı dakīk kapısı kurbünde Azebler mahallesinde bir tarafı Sağrıcıbaşı Mustafa Ağa mülkü ve bir tarafı tarîk-i hâs ve bir tarafı tarîk-i âm ve bir tarafı Harâçcı Kara Mehmed Vakfı ile mahdûd olup cânib-i şarkîsinde bir fevkānî odayı ve bir sofayı ve kapı üstünde vâki‘ bir odayı ve bi’r-i mâyı müştemil hisseyi ve cânib-i garbîsinde iki fevkānî odayı ve bir ahırı ve bir dahlîzi ve bir matbahı ocağı ve iki kenîf ve bir sofayı ve bir sagīr odayı müştemil olan menzil-i icâre-i mu‘accelesiz beher şehr yüz elli akçe ücret-i müeccele ile benim tasarrufumda olup hâlâ evkāf-ı mezbûreye mütevellî olan ebnâ-i sipâhiyândan fahrü’l-akrân Hüseyin Bey b. Memi menzil-i mezbûru icâre-i müeccele ile dahi vermek murâd edip tâlibîne arz ettikde sâlifü’z-zikr cânib-i şarkdan ba‘de’l-ifrâz bir fevkānî odayı ve sofa ve kapı üstünde vâki‘ bir oda ve bi’r-i mâ bin akçe icâre-i mu‘accele ile benim üzerinde karâr edip ziyâde ile tâlibi bulunmamağın mütevellî-i mezbûr bin akçe icâre-i mu‘acceleyi benden aldıkdan sonra hisse-i mezbûreyi târîh-i kitâb şehri gurresinden beher mâh ellişer akçe ücret-i müeccele ile bana îcâr edip tasarrufu için yedime temessük def‘ etmişdir. Nazar olunup mûcebince kıbel-i şer‘-i şerîfden dahi elime hüccet-i şer‘iyye dahi verilmek matlûbumdur deyu hatemi ile mahtûm ve imzâsıyla mümzâ ve bin iki yüz otuz iki senesi Şevvâlü’l-mükerremi’nin gurresiyle müverrah temessükünü ibrâz edip nazar olundukda min-külli’l-vücûh meşrûhuna mutâbık bulunmağın savb-ı şer‘-i şerîfden işbu hurûf ber-sebîl-i temessük ketb olundu. Tahrîren fi’t-târîhi’l-mezbûr. Şühûdü’l-hâl: Mustafa Ağa Reis-i sağrıcıyân, Mehmed Efendi [b.] Ahmed el-imâm, Sinan Halîfe b. Ali el-imâm, Mustafa b. Sinan el-mülâzım, Mustafa Dede b. Ahî, Osman Dede b. Sinan el-kâtib, Mehmed Bey b. Abdüsselam el-kayyım, Mehmed Çelebi b. Mehmed es-serrâc, Ahmed Dede el-cündî, Yusuf b. Mustafa el-müezzin, Mehmed b. Abdullah er-râcil, Mahmud b. Mustafa, el-Hâc Murad b. Abdullah el-attâr, Mehmed Çelebi b. Abdülgani.