Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 411 Hüküm no: 355 Orijinal metin no: [115b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Azebler mahallesinde kiracısı oldukları evin tamirini kendi paralarıyla yapan Derviş Ahmed ile karısı Müslime Hatun’un yaptıkları masrafın tespiti Sâhibü hâze’l-kitâb Derviş Ahmed b. Hüseyin meclis-i şer‘-i şerîfde zevcesi Müslime Hatun bt. ( ) mahzarında takrîr-i kelâm kılıp Dârü’s-saltanati’s-seniyye Kostantıniyyetü’l-mahmiye mahallâtından Azebler mahallesinde vâki‘ biri tarafı Sağrıcıbaşı Mustafa Ağa mülkü ve bir tarafı tarîk-i hâs ve bir tarafı tarîk-i âmma ve bir-tarafı Harâçcı Kara Mehmed vakfı ile mahdûd büyût-ı müte‘addideyi hâvî olup zevcem mezbûre Müslime Hatun’un beher mâh yüz elli akçe ücret-i müeccele ile olan menzil bundan akdem harâba müşrif olmağla mezkûre Müslime Hatun’un harcı icâre-i mu‘acceleden mahsûb olmak üzere mâlından binâ ve meremmet etmek üzere mütevellîsinden istîzân edip ba‘de’l-istîzân binâ ve meremmet lâzım geldikde bana kendi mâlından binâ ve meremmet ile sarf ettiği mâlını yine bana kendi mâlımdan îfâ ederin deyu sâbıkā binâ ve meremmete bana emr edip menzil-i mezbûrun minvâl-i meşrûh üzere olan binâ-i cedîd ve meremmete muhtâc olan mevâzi‘i binâsına ve meremmetine beni tevkîl edip ben dahi emr ve tevkîli muktezâsınca menzil-i mezbûrede cedîd binâya ve meremmete muhtâc olan yerleri kendi mâlım ile binâ ve meremmet eyledim vâki‘ hâl mezbûre Müslime Hatun’dan suâl olunup harcım bana îfâ olunmak matlûbumdur dedikde gıbbe’s-suâl merkūme Müslime Hatun fi’l-vâki‘ ben geri kendi mâlımdan îfâ etmek üzere menzil-i mezbûrda cedîd binâya ve meremmete muhtâc olan yerleri kendi mâlıyla binâya binâsı ve meremmeti vardır ve varsa ben kendi mâlımdan harcını ona îfâ edem dilerse menzil-i mezbûrun nısfını ona fâriğ olam ba‘de’l-ferâğ harcı dahi icâre-i mu‘acceleden mahsûb olmak üzere vakfda dura kıbel-i şer‘-i şerîfden üzerine varılıp harcının tahammülü görülmek matlûbumdur demeğin savb-ı şer‘-i şerîfden zümre-i müderrisînden Mevlânâ Mahmud Efendi ve Hâssa mi‘mârlardan Üstâd Hasan b. Hüseyin irsâl olunup zeyl-i kitâbda mastûretü’l-esâmî olan Müslimîn ile mahall-i mezbûrun üzerine varılıp mesârifi takvîm olundukda tûlen yirmi zirâ‘ taş duvar tecdîd olunup her zirâ‘ı altmışar akçeden bin iki yüz akçe ve yirmi beş zirâ‘ tuğla duvar dahi tecdîd olunup her zirâ‘ < ve sıvasıyla bin iki yüz akçe ve iki tahta-pûş döşemesi yedi yüz yirmi akçe ve sofa döşemesine dahi bin iki yüz akçe ve çardak döşemesine ve meremmetine bin yüz elli akçe ve tûlen yirmi zirâ‘ ve arzen on sekiz zirâ‘ hesâb-ı şatrancî ile dört zirâ‘ sakfının kireç ve horasanına ve kiremid ahtarmasına her zirâ‘ı altışar akçeden iki bin dört yüz akçe ve tahta-pûş meremmetine yüz seksen akçe ve orta sofanın tahtasına dahi yüz otuz akçe ve on iki kürsü taşı altısı tecdîd olunup ve altısı dahi atîk olup cedîdine dokuz yüz akçe ve atîkine altı yüz akçe ve fevkānî iki kat tahta havlusuna beş bin beş yüz akçe ve sokak kapısına yüz altmış akçe ve on ikişer zirâ‘ üç oluk içi zifti üstâdiyyesiyle her dânesine ikişer yüz akçeden altı yüz akçe bu zikr olunan eşyânın mecmû‘u cem‘an mezkûr Derviş Ahmed’in kendi mâlından on dört bin beş yüz akçelik harcı bulunup menzil-i mezbûrun nısf hakk-ı tasarrufunu merkūm Müslime Hatun mezkûr Derviş Ahmed’e mütevellîsi ma‘rifetiyle ferâğ edip ol dahi kabûl ve meblağ-ı merkūm on dört bin beş yüz akçesi icâre-i mu‘acceleden mahsûb olmak üzere vakf-ı mezbûrda durmak için vâki‘ hâli mevlânâ-yı mezbûr mahallinde tahrîr edip ba‘dehû meclis-i şer‘a gelip ihbâr edicek mâ-hüve’l-vâkı‘ bi’t-taleb ketb olundu. Tahrîren fî-gurreti Zilka‘de li-sene isneyn ve selâsîn ve elf. Şühûdü’l-hâl: Hüseyin Halîfe b. Ebubekir, el-Hâc Murad b. Abdullah, Ebubekir Dede b. Ahmed, Mustafa Çelebi b. Sinan Efendi, Sinan Efendi b. ( ) el-İmâm.