Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 412 Hüküm no: 356 Orijinal metin no: [116a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’ndan Gelinkiras tevliyetine bağlı köylerin zimmilerinden toplanması gereken cizye vesaire için mültezimleri arasında çıkan ihtilaf Sâhibü hâze’l-kitâb zümre-i silahdârândan on sekizinci bölükden yevmî otuz sekiz akçe ulûfeye mutasarrıf olan fahrü’l-akrân Ali Bey b. Mehmed nâm silâhî meclis-i şer‘-i şerîfe hâzır olup takrîr-i kelâm kılıp Haremeyn-i Şerîfeyn Evkāfı’ndan Gelinkiras tevliyetine tâbi‘ Gülümgan ve Hınzıri ve Kesdoğan ve Akin ve Sarıkaya ve Koyunabdalı ve Tuzhisarı ve Selçikhân ve tevâbi‘i karyelerinde sâkin olup mukaddemâ eşkıyâ istilâsında perâkende ve perîşân olan Medîne-i Münevvere evkāfı re‘âyâsından zimmî tâifesinin üzerlerine edâsı lâzım gelen cizye ve ispençe ve âdet-i ağnâm ve beytülmâl ve cürm [ü] cinâyet ve sâir bâd-ı havâları vakf-ı şerîfe hâsıl kayd olunmağla herkes bulundukları yerlerde vakf cânibinden taleb ve tahsîl oluna gelen bin otuz üç [me]vâcibi için sene tamâmına değin Dârüssaâde hazînesine teslîm etmek üzere re‘âyâ-yı mezbûrûnun üzerlerine lâzım gelen cizye ve sâir rüsûmlarının cem‘ ve tahsîl etmesin İbrahim Çavuş nâm kimesne <> bir senesin üç yüz kırk bin akçeye kendi üzerine deruhde ettikde atebe-i aliyyede mülâzımîn beynlerinde tevzî‘ olundukda mukāta‘a-i mezbûre silahdârlar zümresinden ellinci bölükde yevmî yirmi üç akçe ulûfeye mutasarrıf olan Hasan Ali Dede nâm kimesneye mezbûr İbrahim Çavuş’un ilzâmı üzere yine akçesini Dârüssaâde hazînesine teslîm eylemek üzere üç yüz kırk bin akçeye olmak üzere ta‘yîn ve deruhde ve tevcîh olunup bin otuz iki Saferü’l-muzafferinin üçüncü günü berât olundukdan sonra merkūm Hasan Ali Dede sâlifü’z-zikr bin otuz üç senesi hazînesini ve sâir rüsûmun cem‘ini benim üzerime deruhde edip ben dahi varıp cem‘ine mübâşeret ettiğimde bazı re‘âyâ şirrete sâlik olup vakf-ı mezbûrun cizyesini İbrahim Çavuş’a teslîm eyledik deyu cizyelerin ve sâir rüsûmların bana vermekde ta‘allül ettiklerine binâen Südde-i saâdet’e gelip vâki‘ hâli inhâ ettiğimde merkūm İbrahim Çavuş ihzâr olunup şer‘-i şerîfe havâle olunup murâfa‘a olduğumuzda re‘âyâ-yı mezbûrûndan bin otuz üç senesi mevâcibi için cizyelerinden ve sâir rüsûmlarından kalîl ve kesîr akçe aldın mı deyu suâl olundukda inkâr ile cevâb vermeğin re‘âyâ-i mezbûrlardan ta‘allül edenlerin kelâmlarına i‘tibâr olunmayıp sâlifü’z-zikr bin otuz üç mevâcibi için re‘âyâ-yı merkūmûndan uhdelerine lâzım gelen cizye ve ispençe ve âdet-i ağnâm ve beytülmâl ve cürm [ü] cinâyet ve sâir bâd-ı havâ rüsûmları tahsîl olunmak için fermân olunup cem‘i için yedime emr-i celîlü’l-kadr inâyet olunmağın nazar olunup yedime hüccet-i şer‘iyye dahi verilmek matlûbumdur deyu tuğrâ-yı garrâ ile mu‘anven ve isneyn ve selâsîn ve elf Zilka‘desi’nin on üçüncü günü ile müverrah menşûr-ı sultân îrâd ve ibrâz edip nazar olundukda min-külli’l-vücûh kelâm-ı meşrûhuna mutâbık bulunmağın savb-ı şer‘-i şerîfden işbu hurûf ber-sebîl-i temessük ketb olundu. Fî-evâsıtı Zilhicce li-sene isneyn ve selâsîn ve elf. Şühûdü’l-hâl: Osman Çelebi el-bevvâbü’s-sultânî, Mustafa Çelebi b. ( ) el-bevvâbü’s-sultânî, Mehmed Bey b. Ali el-cündî, Ömer Bey b. Mustafa el-cündî, Mahmud Efendi b. Ömer el-müderris.