Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 415 Hüküm no: 358 Orijinal metin no: [116b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadrazam Ali Paşa’nın oğlu Mehmed Ağa Kasımpaşa Cezeri mahallesinde iki ayrı vakfa ait olan evi kiralayarak hüccetini aldığı Sâhibü hâze’l-kitâb sâbıkā Sadrıazam iken vefât eden merhûm ve mağfûrun-leh Ali Paşa hazretlerinin sulbî oğlu olup Dergâh-ı âlî müteferrikalarından olan kıdvetü’l-e‘âzım ve’l-a‘yân Mehmed Ağa’nın husûs-ı âti’z-zikre vekîl-i şer‘îsi olan fahrü’l-emâsil ve’l-akrân Murad Ağa b. Ramazan meclis-i şer‘-i şerîfe hâzır olup takrîr-i kelâm kılıp Dârü’s-saltanati’s-seniyye Kostantıniyyetü’l-mahmiye mahallâtından Kasım Paşa Cezerî mahallesinde vâki‘ bir tarafı Haydar b. Abdullah mülkü ve bir tarafı İlyas Dede Zâviyesi ve bir tarafı tarîk-i hâs ve bir tarafı tarîk-î âm ile mahdûd olup muhavvata-i dâhiliyyesi bir beyt-i süflî ve matbahı ve fevkinde iki bâb beyt-i ulvîyi ve hamâmı ve bi’r-i mâyı ve havluyu ve kenîfi ve muhavvata-i hâriciyyesi bir beyt-i süflîyi ve bir ahırı ve ahır üzerinde iki bâb fevkānî odaları ve kenîfi müştemil Telhîsî Oruc Ağa menzilinin nısfı Haremeyn-i Muhteremeyn Evkāf-ı şerîfelerinden olup ve nısf-ı âharı belde-i Hazret-i Ebî Eyyubü’l-ensârî radıye anhu Rabbühü’l-bârî’de vâki‘ Takyacıbaşı merhûm Ca‘fer Ağa mescid-i şerîfi evkāfından olmağla menzil-i mezbûru mahlûldür deyu bi’l-fi‘il Haremeyn-i Muhteremeyn Evkāfı mütevellîsi olan ebnâ-i sipâhiyândan Ali Bey b. Mehmed ve merhûm-ı mezbûr Takyacıbaşı Ca‘fer Ağa evkāfının bi’l-fi‘il mütevellîsi olan Hüsameddin Halîfe b. Abdurrahman tevliyetleri hasebi ile zabt ettiklerinden sonra icâre-i mu‘accele ile tâlib olanlara arz edip âhirü’l-emr seksen bin akçe icâre-i mu‘accele ve beher yevm dörder akçe ücret-i müeccele ile müvekkilim müşârun-ileyh [117a] Mehmed Ağa üzerinde karâr edip ziyâde ile tâlibi bulunmamağın merkūm Ali Bey Medîne-i Münevvere -alâ-münevvirihâ [efdalü’t-tahiyye]- evkāf-ı şerîfesi cânibine müvekkilim mûmâ-ileyh Mehmed Ağa yedinden kırk beş bin akçe ve mezkûr Hüsameddin Halîfe dahi Takyacıbaşı merhûm-ı mezbûr Ca‘fer Ağa evkāfı cânibine otuz beş bin akçe icâre-i mu‘accele ahz ve kabz ettiklerinden sonra mütevelliyân-ı mezbûrân işbu selâse ve selâsîn ve elf senesi şehr-i Rebî‘ülâhirinin gurresinden minvâl-i meşrûh üzere beher yevm dörder akçe ücret-i müeccele ile müvekkilim müşârun-ileyh Mehmed Ağa’ya menzil-i mezbûrun mecmû‘unu iştirâken mahlûlden îcâr edip lâzım gelirse icâre-i mu‘accelesinden mahsûb olmak üzere mâlından meremmet ve binâya izin verip tasarrufu için yedine her birisi temessük dahi vermişdir. Nazar olunup mûcebince cânib-i şer‘-i şerîfden dahi eline hüccet-i şer‘iyye verilmek matlûbumdur deyu mütevelliyân-ı mezbûrânın imzâları ile mümzâ ve hatemleri ile mahtûm ve târîh-i merkūm ile müverrah temessüklerini ibrâz edip nazar olundukda her vechile vekîl-i mezbûr Murad Ağa’nın takrîr-i meşrûhuna mutâbık bulunmağın savb-ı şer‘-i şerîfden mûceblerince işbu hurûf ber-sebîl-i temessük ketb ve yed-i tâlibe def‘ olundu. Tahrîren fî-evâhiri şehri Rebî‘i’l-âhir li-sene selâse ve selâsîn ve elf. Şühûdü’l-hâl: Fahrü’l-kuzât Mahmud Efendi b. Ömer, Halil Efendi b. Mahmud el-müderris, Mehmed Çelebi b. Abdülgani, Hasan Ağa b. Abdülmennan, Mehmed Efendi b. İbrahim Kâtib-i dîvân, Mustafa Ağa b. Mehmed el-müteferrika, Abdülaziz b. Hüsam Efendi.