Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 416 Hüküm no: 359 Orijinal metin no: [117a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakubağa mahallesinde kiracısı olduğu vakıf evi tamir ettiren ancak yaptığı masarafı tespit ettirmeden ölen Mehmed Efendi’nin varisi küçük oğlu Abdülkadir’in vasisi tarafından bu tespitin yaptırılması Dârü’s-saltanati’s-seniyye Kostantıniyyetü’l-mahmiye mahallâtından Ya‘kub Ağa mahallesinde bundan akdem vefât eden merhûm Mehmed Efendi’nin sulbî sagīr oğlu Abdülkadir’in kıbel-i şer‘-i şerîfden vasiyy-i mansûbesi olan vâlidesi İsmihan bt. Abdurrahman meclis-i şer‘-i şerîfe hâzıra olup takrîr-i kelâm ve ta‘bîr ani’l-merâm kılıp Haremeyn-i Muhteremeyn Evkāf-ı şerîfelerinden olup mahalle-i mezbûrede vâki‘ olup inde’l-ahâlî ve’l-cîrân ma‘lûmü’l-hudûd olan menzili merhûm-ı mezbûr Mehmed Efendi icâre-i mu‘accele ve müeccele ile mutasarrıf iken harcı icâre-i mu‘acceleden mahsûb olmak üzere mütevellî-i vakf tarafından binâya me’zûn olduğu hasebi ile menzil-i mezbûrda birkaç def‘a bazı ebniye ihdâs edip harcının tahammülünü yedine keşf ettirip lâkin âhir ömründe menzil-i mezbûrun muhavvata-i dâhiliyyesinde cânib-i şarkîsinde minvâl-i meşrûh üzere harcı icâre-i mu‘acceleden mahsûb olmak üzere kasr şeklinde bir musanna‘ oda ve hamâm üzerinde bazı kayağan ve menzil-i mezbûrun cânib-i garbîsinde dahi bir beyt-i sagīr ve bir tahta-pûş ve asma için mevcli boyalı bir çardak ve bir kemerli kârgîr zîr-i zemîn ve muhavvata-i hâriciyyesinde müceddeden bir ahır ve otluk damı dahi binâ ve ihdâs edip bu mezkûrât ebniye-i müceddedenin tahammülü dahi görülmedin vefât edip menzil-i mezbûr hasren sagīr oğlu merkūm Abdülkadir’e intikāl etmeğin sâlifü’z-zikr ebniyeye sarf olunan mâl yetîm-i mezbûr tarafından icâre-i mu‘accelesine mahsûb olmak için kıbel-i şer‘-i şerîfden üzerine varılıp ne mikdâr akçe harc u sarf olunduğu tahammülü görülmek matlûbumdur dedikde savb-ı şer‘-i şerîfden zümre-i müderrisînden Mevlânâ Ca‘fer Efendi ve Hâssa mi‘mârlardan Üstâd Hasan b. Hüseyin irsâl olunup zeyl-i kitâbda mastûretü’l-esâmî olan Müslimîn ile üzerine varılıp nazar ve zikr olunan kasr ve kayağan ve beyt-i sagīr ve tahta-pûş ve asma çardağı ve zîr-i zemîn ve ahırın ve otluk damının her birinin kerestesini fürâdâ takvîm ve kıymetlerini cem‘ ettiklerinde mecmû‘u elli altı bin üç yüz altmış akçe olup meblağ-ı merkūm mikdâr masrafında ittifâk ettiklerinde bi’l-fi‘il Haremeyn-i Muhteremeyn Evkāf-ı şerîfesine mütevellî olan Ali Bey b. Mehmed dahi meblağ-ı merkūmu icâre-i mu‘accelesinden [mahsûb] olmak üzere hesâb ve kabûl etmeğin vâki‘ hâli mevlânâ-yı mezbûr mahallinde tahrîr edip ba‘dehû meclis-i şer‘-i şerîfe gelip ihbâr edicek mâ-hüve’l-vâkı‘ bi’t-taleb ketb ve yed-i tâlibe def‘ olundu. Tahrîren fî-evâili Cumâdelûlâ li-sene selâse ve selâsîn ve elf. Şühûdü’l-hâl: Ahmed Efendi el-kādî, Abdülgani Efendi el-müderris, Mehmed Çavuş el-cündî, Ali Çavuş el-cündî el-Mübâşir, Seyyid Ali Çavuş el-mübâşir, Veli Bey Mütevellî-i sâbık, Mehmed Çelebi b. Abdülgani, Ahmed Beşe er-râcil, Mustafa Çelebi Kâtibü’l-vakf, Ali Beşe el-câbî.