Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 418 Hüküm no: 361 Orijinal metin no: [117b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çavuş’un mülkiyet üzere tasarruf ettiği Sofular mahallesindeki evin Hüma Hatun Vakfı olduğu Bi’l-fi‘il Rumeli kazaskeri olan umdetü’l-ulemâi’l-izâm zübdetü’l fudelâi’l-fihâm keşşâfü’l-müşkilâti’d-dîniyye hallâl-i mu‘dilâtü’l-yakīniyye el-âlimü’l-fâzılü’r-rabbânî ve’n-nihrü’l-kâmilü’s-samedânî halîf-i ulûmü’l-evvelîn ve hâvi-yi kelimâtü’l-âhirîn el-mahfûf bi-sunûfi’l-meliki avâtıfü’l-mu‘allâ Mustafa Efendi hazretleri cânib-i âlîlerinden <> husûs-ı âti’l-beyâna istimâ‘ı için bu dâ‘ilerine işâret-i âliye sudûr etmekle imtisâlen li’l-emr akd-i meclis olundukda mahmiye-i Kostantıniyye mahallâtından Sofular mahallesinde sâkine olup cânib-i şer‘den vakf-ı âti’l-beyânı da‘vâya mütevellîye nasb olunan işbu bâ‘isetü’l-kitâb Sâbiha Hatun bt. Pervîz meclis-i şer‘-i şerîf-i lâzımü’t-teşrîfde menzil-i âti’l-beyâna vâzı‘ü’l-yed olan Mustafa Çavuş b. ( ) mahzarında iddi‘â ve takrîr-i kelâm kılıp mahalle-i mezbûre sâkinelerinden olup [118a] bundan akdem vefât eden hâlâ merhûme Hümâ Hatun bt. Mustafa mahalle-i mezbûrede vâki‘ bir cânibden Mehmed b. Mustafa mülkü ve iki tarafdan tarîk-i âm ile ve Sarıgörez Mescidi ile mahdûd dâhiliyye ve hâriciyye iki muhavvatayı ve büyût-ı müte‘addide ve bi’r-i mâyı hâvî mülk menzilini hâl-i hayâtında ve kemâl-i sıhhatinde evvelâ kendi nefsine ba‘dehâ ibn-i sulbîsi mezbûr Mustafa Çavuş’a ba‘de vefâtihî kendi kız karındaşı ve benim vâlidem olup vefât eden merhûme Kamer Hatun’a ve mezbûre Kamer’in evlâdına ve evlâd-ı evlâdına ile’l-inkırâz ve ba‘de’l-inkırâz evlâd-ı evlâdına mezbûre Kamer’in utekāsına ve evlâd-ı utekāsına neslen ba‘de neslin ile’l-inkırâz Medîne-i Münevvere şerrefehallâhu te‘âlâya vakf-ı sahîh ve habs-i sarîh ile hâlâ mazmûn-ı mezbûru müeyyed ve musaddak yedimde sûret-i vakfiyye-i şer‘iyye dahi var iken mezbûr Mustafa Çavuş menzil-i mezbûru mülkiyyet üzere tasarruf edip ibtâl-i vakfiyyet eylemişdir sûret-i vakfiyye-i şer‘iyye mûcebince menzil-i mezbûrun vakfolmasını taleb ederin dedikde gıbbe’l-istintâk mezbûr Mustafa Çavuş fi’l-vâki‘ mezbûre Kamer merkūme Hümâ Hatun’un kız karındaşıdır ve mezbûre Sâbiha mesfûre Kamer’in kızıdır. Lâkin menzil-i mezbûr merkūme Hümâ Hatun’un mülk-i hâlisi olup ba‘de vefâtihâ bi-ciheti’l-inhisâr menzil-i mezbûr bana intikāl etmişdir. Vakf-ı meşrûh üzere vakfeylediğini bilmezin deyu vakfiyye-i şer‘iyyenin mazmûnunu inkâr ile cevâb verip ba‘de talebi’l-beyyine mahalle-i mezbûrede sâkin Solaklar Kethüdâsı Mustafa b. Abdülmennan ve el-Hâc İlyas b. Abdullah nâm kimesneler li-ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-vâki‘ merkūme Hümâ Hatun menzil-i mahdûd-ı mezbûru hâl-i hayâtında evvelâ kendi nefsine ba‘dehâ ibn-i sulbîsi mezbûr Mustafa Çavuş’a ba‘de vefâtihî kız karındaşı merkūme Kamer’e ve merkūme Kamer’in evlâdına ile’l-inkırâz ba‘de’l-inkırâz mezbûre Kamer’in utekāsına ve evlâd-ı utekāsına neslen ba‘de neslin ile’l-inkırâz ve ba‘de’l-inkırâz silsiletü’l-cümle Medîne-i Münevvere’ye mülk-i hâlisi iken vakf-ı sahîh ve habs-i sarîh eyledi. Hâlâ menzil-i mezbûr merkūme Kamer’in vech-i mübeyyen üzere vakf-ı sahîhleridir. Bu husûsa şâhidleriz, şehâdet dahi ederiz deyu sûret-i vakfiyye-i şer‘iyye mazmûnuna mutâbık edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a olup menzil-i mezbûrun vech-i meşrûh üzere vakfiyyetine hükmolunup bu vesîka-i enîka alâ-hüve’l-hakīka ketb olundu. Tahrîren fî-evâili Zilhicceti’l-harâm li-sene ışrîn ve elf. Şühûdü’l-hâl: Abdi Efendi b. Hüseyin el-müderris, Mehmed Çavuş b. Davud, Hüseyin b. Abdullah el-cündî, Hızır b. Hüseyin, Hüseyin b. Abdullah el-cündî, Alâeddin Efendi b. Ahmed, Hasan b. Yusuf, Mehmed b. Ramazan, Hüsam b. Abdurrahman el-hatîb, Mustafa b. Ali el-imâm.