Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 419 Hüküm no: 362 Orijinal metin no: [118a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata Cami-i kebir mahallesinde kiracısı olduğu vakıf evi tamir eden Hacı Mansur’un yaptığı masrafın tesbiti Haremeyn-i Muhteremeyn Evkāf-ı şerîfelerinden olup mahrûse-i Galata dâhilinde Câmi‘-i kebîr mahallesinde vâki‘ inde’l-ahâlî ve’l-cîrân ma‘lûmü’l-hudûd olan menzili on iki bin akçe icâre-i mu‘accele ve her yevm ikişer akçe ücret-i müeccele ile mutasarrıf olan reisler zümresinden fahrü’l-emâsil el-Hâc Mansur b. el-Hâc Abdullah el-ma‘rûf bi-Asabî nâm kimesne meclis-i şer‘-i şerîfe hâzır olup takrîr-i kelâm ve ta‘bîr ani’l-merâm kılıp bundan akdem menzil-i mezbûr harâba müşrif olup münhedim olmak üzere iken icâre-i mu‘accele ve ücret-i müeccele ile îcâr olundukda hîn-i îcârda evkāf-ı mezbûreye mütevellî olan ebnâ-i sipâhiyândan fahrü’l-emâsil ve’l-akrân Ali Bey b. Mehmed nâm cündî menzil-i mezbûrda müceddeden binâsı lâzım olacak mevâzi‘i tecdîd ve meremmâtı lâzım olacak mevâzi‘i meremmete icâre-i mu‘acceleme mahsûb olmak üzere mâlım ile binâ ve meremmet etmesine bana izin ve yedime temessük verip ben dahi minvâl-i meşrûh üzere müceddeden binâ ihdâsına ve meremmete me’zûn olduğum hasebi ile menzil-i mezbûru mâlım ile imâret ve meremmet eyledim kıbel-i şer‘-i şerîfden üzerine varılıp ne mikdâr akçe harc u sarf olunduğu tahmîn ve tahammülü görülmek matlûbumdur dedikde savb-ı şer‘-i şerîfden zümre-i müderrisînden Mevlânâ Ca‘fer Efendi ve Hâssâ mi‘mârlardan Üstâd Hasan b. Hüseyin irsâl olunup zeyl-i kitâbda mastûretü’l-esâmî olan Müslimîn ile mahall-i mezbûrun üzerine varıp müceddeden ihdâs olunan ebniyeyi her birini ale’l-infirâd takvîm ve meremmâtı dahi tahmîn ve masrafını ta‘yîn ettiklerinde mecmû‘u doksan yedi bin iki yüz elli dört akçe edip ihdâs olunan ebniye ve meremmâtının meblağ-ı merkūme tahammülü vardır deyu meblağ-ı mezbûr masrafında ittifâk ettiklerinde mevlânâ-yı mezbûr vâki‘ hâli mahallinde tahrîr edip ba‘de meclis-i şer‘-i şerîfe gelip ihbâr edicek meblağ-ı merkūm doksan yedi bin iki yüz elli dört akçe mezkûr el-Hâc Mansur’un icâre-i mu‘accelesine mahsûb olmak üzere işbu hurûf ber-sebîl-i temessük ketb ve yed-i tâlibine def‘ olundu. Tahrîren fî-evâhiri Cumâdelûlâ li-sene selâse ve selâsîn ve elf. Şühûdü’l-hâl: el-Hâc Habib Reis b. Osman er-râcil, el-Hâc Selim b. Beyce, el-Hâc Mustafa b. Abdullah, Mustafa Efendi b. Mehmed el-imâm, Ahmed Efendi b. Muharrem, Receb Halîfe b. Mehmed el-müezzin, Üstâd İbrahim b. Ali en-neccâr, Mehmed Reis b. İbrahim, Mehmed Çelebi b. Mahmud, Mehmed Reis b. Şaban, Mehmed Çelebi b. ( ) er-reis.