Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 420 Hüküm no: 363 Orijinal metin no: [118b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf olduğu iddia edilen Seyyid Ömer mahallesindeki evin İskender Beşe b. Abdullah’ın mülkü olduğu Haremeyn-i Muhteremeyn Evkāf-ı şerîfesine bi’l-fi‘il mütevellî olan ebnâ-i sipâhiyândan fahrü’l-akrân Ali Bey b. Mehmed meclis-i şer‘-i şerîfde sâhibü hâze’l-kitâb mahmiye-i Kostantıniyye mahallâtından Seyyid Ömer mahallesi sâkinlerinden Dergâh-ı âlî -dâme mahfûfen bi’l-me‘âlî- yeniçerilerinden İskender Beşe b. Abdullah mahzarında ikrâr ve takrîr-i kelâm kılıp mahalle-i merkūmede vâki‘ iki tarafı Cündî Behram Bey mülkü ve bir tarafı merhûm Mustafa Bey b. Abdülmennan vakfı ve bir tarafı tarîk-i âm ile mahdûd olup dâhiliyyesi bir beyt-i süflî ve sofayı ve cüneyneyi ve bi’r-i mâyı ve fırın ve kenîfi müştemil ve hâriciyyesi bir beyt-i ulvî ve tahtında ıstablı ve bi’r-i mâyı ve hücre ve kenîfi müştemil olan menzil mukaddemâ merhûm mezbûr Mustafa Bey’in mülkü olup taht-ı tasarrufunda iken bin bir senesi evâilinde merkūm Mustafa Bey vefât ettikde sâlifü’z-zikr menzili veresesi bey‘ edip tedâvül-i eyâdi ile hâlâ mezkûr İskender Beşe şirâ-i şer‘î ile menzil-i mezbûra mâlik olup mutasarrıf iken bazı kimesneler menzil-i mahdûd Medîne-i Münevvere fukarâsına vakıfdır deyu bana cevâb etmekle husûs-ı mezbûr tefahhus ve tetebbu‘ edip menzil-i mezkûrun vakfiyyeti bir tarîk ile müsbet olmayıp sâlifü’z-zikr menzil-i mesfûr İskender Beşe’nin mülk-i müşterâsı ve hakk-ı sarîhi idiği zâhir olmağla da‘vâdan ferâğ eyledim demeğin menzil-i mezbûr merkūm İskender Beşe’nin mülk-i müşterâsı olmak üzere yedinde ibkā olundu. Mâ-hüve’l-vâkı‘ bi’t-taleb ketb olundu. Tahrîren fî-evâili Cumâdelâhire li-sene selâse ve selâsîn ve elf. Şühûdü’l-hâl: el-Hâc Hasan Çelebi b. Ahmed el-cündî, Hasan Halîfe b. Şaban el-imâm, Seyyid Mustafa b. es-Seyyid Emrullah el-müezzin, Abdülkerim Halîfe b. Ali el-imâm el-Eyyûbî, Hasan b. Abdullah, Ali Bey b. Hızır el-cündî, el-Hâc Mehmed b. Abdi eş-şehriyârî, Mehmed Bey b. Sefer er-râcil, Ramazan Halîfe b. Mustafa, Halil b. İsmail el-müezzin, Mehmed Çelebi b. Abdülgani.