Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 421 Hüküm no: 364 Orijinal metin no: [118b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kamer Hatun vakfı olup harab durumda olan evin tamirine gücü yetmeyen ve halen tasarruf eden Safiye bt. Abdullah’ın Haremeyn Vakfı’na teberru etmesinden dolayı Mehmed Ağa b. Abdülmennan’a kiralandığı Haremeyn-i Muhteremeyn Evkāf-ı şerîfesine bi’l-fi‘il mütevellî olan ebnâ-i sipâhiyândan fahrü’l-emâsil ve’l-akrân Ali Bey b. Mehmed meclis-i şer‘-i şerîfde sâhibü hâze’l-kitâb bi’l-fi‘il Dergâh-ı âlî dâme mahfûfen bi’l-me‘âlî yeniçerileri kethüdâ beyi olan kıdvetü’l-e‘âzım ve’l-a‘yân Mehmed Ağa b. Abdülmennan tarafından ikrâr-ı âti’z-zikri tasdîka vekîl-i şer‘îsi olan fahrü’l-cüyûş Abdulbâki Çavuş b. ( ) mahzarında ikrâr ve takrîr-i kelâm kılıp evkāf-ı mezbûreden olup Dârü’s-saltanati’l-seniyyeti Kostantıniyyetü’l-mahmiye mahallâtından Tahtaminâre mahallesinde vâki‘ bir tarafı müşârun-ileyh Mehmed Ağa mülkü ve bir tarafı Âişe Hatun ve Bebek Bey el-cündî ve Halil Ağa mülkleri ve bir tarafı evkāf-ı mezbûreden olup merkūm Abdulbâki Çavuş icâre ile mutasarrıf olduğu menzil ile ve bir tarafı tarîk-i âm ile mahdûd olup tahtânî ve fevkānî odaları ve sofayı ve kenîfi müştemil olan menzil merhûme Kamer nâm hatunun mülkü olup mülkünde iken evvelâ menzil-i mezbûru vakf ve süknâsını evvelâ nefsine ba‘dehâ utekāsına ba‘de’l-inkırâz Medîne-i Münevvere’ye şart edip ba‘dehû merhûme mezbûre Kamer Hatun vefât edip menzil-i mezbûrun süknâsı utekāsından Safiye bt. Abdullah nâm hatuna intikāl edip mutasarrıfe iken menzil-i mezbûr harâba müşrif olup meremmet etmesine kudreti olmamağla hakk-ı süknâsını Haremeyn-i Muhteremeyn fukarâsına teberru‘ ve ferâğ ve menzil-i mezbûru bana teslîm edip ben dahi kabz ve tesellüm ettiğimden sonra sâlifü’z-zikr menzili on bin akçe icâre-i mu‘accele ve beher yevm üçer akçe ücret-i müeccele ile istîcâra müşârun-ileyh Mehmed Ağa hazretleri tâlib olmağla evkāf-ı mezbûre için yedinden on bin akçe icâre-i mu‘accele ahz ve kabz ettiğimden sonra mârru’z-zikr menzili târîh-i kitâb şehri gurresinden beher mâh doksanar akçe ücret-i müeccele ile müşârun-ileyh Mehmed Ağa hazretlerine tevliyet-i mahkiyem hasebi ile îcâr edip ol dahi vech-i meşrûh üzere istîcâr ettikden sonra menzil-i mezbûrda cedîd binâ ihdâsına ve lâzım olursa icâre-i mu‘accelesine mahsûb olmak üzere mâlı ile binâ-i cedîd ihdâsına ve menzil-i mezbûru meremmet etmesine izin verip bu minvâl üzere hatm ve imzâm ile mümzâ ve mahtûm yed-i âliyelerine temessük dahi i‘tâ eyledim. Ba‘de’l-yevm beher mâh ta‘yîn olunan doksanar akçe ücret-i müeccelesini mâdâm ki evkāf-ı mezbûre câbîsine teslîm edeler keyfe mâ yeşâ ve yahtâr tasarruf buyuralar dedikde mütevellî-i mezbûru ikrâr-ı meşrûhunda vekîl-i merkūm Abdulbâki Çavuş vicâhen tasdîk ve şifâhen tahkīk mâ-hüve’l-vâkı‘ kayd şud. Tahrîren fî-evâili Recebi’l-mürecceb li-sene selâse ve selâsîn ve elf. Şühûdü’l-hâl: Halil Efendi b. Mahmud el-müderris, Abdülhalim Efendi b. Mehmed Efendi, Mehmed Çelebi b. Abdülgani, Molla Mehmed b. Pîrî el-müsta‘id, Mustafa Çelebi b. Mehmed el-kâtib, Ali b. Mehmed el-câbî, İsmail Bey el-bevvâbü’s-sultânî.