Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 422 Hüküm no: 365 Orijinal metin no: [119a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasım Gönanî mahallesinde Nesli bt. Kurt Hatun’un tasarrufunda olan vakıf evin yarısını Hatice Hatun bt. Mehmed’e ferağ etmediği Mahmiye-i Kostantıniyye mahallâtından <> Kasım Gönanî mahallesinde sâkine Hadice Hatun bt. Mehmed tarafından husûs-ı âti’z-zikre vekîl olup vekâleti Mahmud b. Mehmed ve Ali b. Hüseyin şehâdetleri ile bi-mâ hüve nehcü’s-sübûk şer‘an sâbite olan Dergâh-ı âlî yeniçerilerinden zevci Mustafa’nın meclis-i şer‘-i şerîfde mahalle-i mezbûre<> sâkinelerinden Nesli <> [bt.] Kurt nâm hatun mahzarında bi’l-vekâle da‘vâ ve takrîr-i kelâm kılıp Haremeyn-i Muhteremeyn Evkāf-ı şerîfesinden olup mahalle-i mezbûrede vâki‘ olan bir tarafı İmâm Hüseyin Efendi mülkü ve bir tarafı Sultançeşmesi ve iki tarafı tarîk-i âm ile mahdûd menzil merkūme Nesli Hatun’un icâre-i mu‘accele ve beher mâh kırk beşer akçe ücret-i müeccele ile tasarrufunda olup taht-ı tasarrufunda iken cânib-i şarkdan menzil-i mezbûrun nısfını yedi bin akçe mukābelesinde müvekkilem merkūme Hadice Hatun’a evkāf-ı mezbûre mütevellîsi ma‘rifeti ile ferâğ ve tefvîz edip ol dahi kabûl ve tefevvüz ettikden sonra cânib-i şarkdan tefevvüz ettiği arsa-i hâliye üzerinde binâya mütevellî-i vakf tarafından me’zûne olduğu hasebi ile kendi mâlı ile müceddeden fevkānî bir bâb oda binâ etmiş iken mezbûre Nesli Hatun minvâl-i meşrûh üzere mebnî olan Hadice’de yedi tasarrufa mâni‘adır suâl olunsun dedikde gıbbe’s-suâl mezbûre Nesli Hatun vech-i mübeyyen üzere ferâğ ve tefvîz ettiğini bi’l-külliye münkire olup vekîl-i merkūm Mustafa Bey’den takrîrine mutâbık beyyine yokdur mezkûre Nesli Hatun ferâğ ve tefvîz etmediğine yemîn eylesin deyip ol dahi vech-i meşrûh üzere menzil-i mezbûrun nısfını tefvîz etmediğine yemîn billâhi’l-aliyyi’l-a‘lâ edicek mâ-hüve’l-vâkı‘ bi’t-taleb ketb olundu. Tahrîren fî-evâhiri şehri Recebi’l-mürecceb li-sene selâse ve selâsîn ve elf. Şühûdü’l-hâl: Mehmed Bey b. Abdullah, Selim b. Ferhad, Abdülhalim Çelebi b. Mehmed el-müderri[s], Mehmed Çelebi b. Abdülgani, Halil Efendi el-müderris ve gayruhüm.