Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 423 Hüküm no: 366 Orijinal metin no: [119a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’ndan Kasım Gönanî mahallesinde Nesli bt. Kurt’tan ev arsasının yarısını alarak ev yapan Hadice bt. Mehmed’in yaptığı masrafın tespiti Mahmiye-i Kostantıniyye mahallâtından Kasım Gönanî mahallesi sâkinelerinden Hadice bt. Mehmed nâm hatun tarafından husûs-ı âti’z-zikre vekîl olup vekâleti Mahmud b. Mehmed ve Ali b. Hüseyin şehâdetleri ile şer‘an sâbite olan yine mezbûre Hadice Hatun’un zevci bâ‘isü tahrîri hâze’l-kitâb Dergâh-ı âlî yeniçerilerinden <> Mustafa <> meclis-i şer‘-i şerîfde bi’l-fi‘il Haremeyn-i Muhteremeyn Evkāf-ı şerîfesine mütevellî olan ebnâ-i sipâhiyândan Ali Bey b. Mehmed mahzarında takrîr-i kelâm kılıp Medîne-i Münevvere sallallâhû te‘âlâ aleyhi ve sellem evkāfından olup mahalle-i mezbûrede vâki‘bir tarafı İmâm Hüseyin mülkü bir tarafı Hadice Sultan mülkü ve iki tarafı tarîk-i âm ile mahdûd olan menzili zevcem mezbûre Hadice Hatun’un akrabasından Nesli bt. Kurd nâm hatun icâre-i mu‘accele ve beher şehr kırkar akçe ücret-i müeccele ile mutassarıfe iken mezbûr Nesli Hatun menzil-i mezbûrun cânib-i kıblîsinde taş nerdübândan incir ağacına varınca olan nısfını evkāf-ı mezbûrun mütevellîsi ma‘rifeti ile müvekkilem mezbûre Hadice Hatun’a ferâğ ve tefvîz edip ol dahi tefevvüz ettikden sonra minvâl-i meşrûh üzere tefevvüz ettiği arsanın üzerinde harcı icâre-i mu‘accelesinden mahsûb olmak üzere cedîd binâ ihdâsına evkāf-ı mezbûre mütevellîsinden izin alıp arsa-i mezbûre üzerinde mâlımız ile bir bâb fevkānî oda binâ eyledik ne mikdâr akçeye tahammülü vardır kıbel-i şer‘-i şerîfden üzerine varılıp ebniyesi takvîm olunup kıymeti icâre-i mu‘accelimize mahsûb olmak matlûbumuzdur dedikde savb-ı şer‘-i şerîfden zümre-i müderrisînden Mevlânâ Ca‘fer Efendi ve Hâssa mi‘mârlarından Üstâd Ali Bey [b.] Halil irsâl olunup zeyl-i kitâbda mastûretü’l-esâmî olan Müslimîn ile mahall-i mezbûrun üzerine varıp mütevellî-i mezbûr Ali Bey ve mezkûre Nesli Hatun muvâcehelerinde vâki‘ ebniyeyi takvîm ettiklerinde tûlen ve arzen yedi şatrancî hesâbı ile altmış üç zirâ‘ döşemenin her zirâ‘ altmışar akçeden altı bin altı yüz akçe ve dolma duvarı dört bin yüz altmış akçe ve musandırası dört bin [119b] akçe ve kenîfi bin yüz akçe ve tavanı bin altı yüz seksen ve kerevet ve tahta-pûşu iki bin seksen akçe ve nerdübân ve neccâriyye ve mismâriye ve meşâkkiyye üç bin yüz beş akçe cem‘an yirmi bir bin iki yüz yetmiş beş akçe kıymet ta‘yîn edip meblağ-ı merkūme tahammülü vardır deyu ittifâk ettiklerinde mütevellî-i mezbûr meblağ-ı merkūmu icâre-i mu‘acceleden hesâb edip vâki‘ hâli dahi mevlânâ-yı mezbûr mahallinde tahrîr edip ba‘dehû gelip ihbâr edicek mâ-hüve’l-vâkı‘ ketb olundu. Fî-evâhiri Recebi’l-mürecceb li-sene selâse ve selâsîn ve elf. Şühûdü’l-hâl: Halil Efendi el-müderris, Abdülhalim Çelebi b. Mehmed el-müderris, Molla Mehmed b. Pîrî el-müsta‘id, Mehmed Çelebi b. Abdülgani, Hüseyin Çelebi b. Kurt, Mustafa Çelebi b. Mehmed, Ali b. Hızır ve gayruhüm.