Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 424 Hüküm no: 367 Orijinal metin no: [119b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Ağa’nın para vakfiyesinin tecdidi Merhûm Sinan Ağa’nın otuz bin akçe nükūdu vakfiyyesidir. Elhamdü li-veliyyihî ve’s-salâtü alâ-nebiyyihî ve alâ-âlihî ve sahbihî ecma‘în ammâ ba‘d işbu vakfiyye-i sahîha-i şer‘iyyenin ve vesîka-i sarîha-i mer‘iyyenin tahrîr ve inşâsına bâdî ve tastîr ve imlâsına dâ‘î budur ki; mahmiye-i Kostantıniyye mahallâtından Ayasofya-i kebîr Câmi‘-i şerîfi mahallesi sükkânından iken bundan akdem vefât eden sâhibü’l-hayrât ve’l-hasenât merhûm ve mağfûrun-leh Sinan Ağa vakfeylediği kâmil otuz bin akçe nükūda bi’l-fi‘il mütevellî olan ebnâ-i sipâhiyândan fahrü’l-emâsil ve’l-akrân el-Hâc Mehmed b. Abdülmennan meclis-i şer‘-i şerîfe hâzır olup takrîr-i kelâm ve ta‘bîr ani’l-merâm kılıp merhûm-ı mezbûr Sinan Ağa târîh-i kitâbdan on iki yıl mukaddem kendi atyeb-i mâlından kâmil otuz bin akçe ifrâz edip ba‘de’l-ifrâz meblağ-ı merkūm kâmil otuz bin akçeyi vakf-ı sahîh-i şer‘ile vakfedip şöyle şart eyledi ki meblağ-ı mezbûr onu on iki rehn-i kavî ve kefîl-i melî ile mütevellîsi yedi ile mu‘âmele-i şer‘iyye ile istirbâh olunup her senede hâsıl olan irbâh helâlinden vâkıf-ı mezbûr rûhiçin müyesser olan evkātda her cüz’-i şerîfin tilâveti beher yevm ikişer akçeye olmak üzere üç cüz’-i şerîf tilâvet oluna deyu kayd edip ve dahi vâkıf-ı mezbûr şöyle şart eyledi ki her cüz’-i şerîfin kāri’i şart-ı vâkıf üzere cüz’-i şerîfi tamâm kırâat eyledikden sonra Resûl-i ekrem sallallâhu te‘âlâ aleyhi ve sellem hazretlerinin rûh-ı pür fütûhlarına on bir kerre salavât-ı şerîfe îrâd edip vâkıf-ı mezbûr rûhu için zıllullâhi saâdetlü pâdişâh-ı âlempenâh hazretlerinin devâm-ı devlet ve bekā-i saltanatı için hayır du‘â edeler ve vâkıf-ı merkūm dahi şöyle şart eyledi ki; vakf-ı mezbûra mütevellî olan kimesne tevliyeti mukābelesinde irbâh-ı mezbûreden beher yevm ikişer akçe vazîfeye mutasarrıf ola ve vâkıf-ı mezkûr dahi şöyle şart eylemişdir ki; kıdvetü’l-a‘yân refîk-i kadîmim olan Ali Ağa b. Abdülmennan nâm kimesne vakf-ı mezkûra nâzır ola ve merkūm Ali Ağa’nın vefâtından sonra Sarây-ı âmire’de her kim Dârü’ş-şifâ ağası olursa nükūd-ı mevkūfe-i mezbûreye hasbî nâzır ola ve emr-i tevliyeti dahi yedinde ola mütevellînin azl ve nasbı nâzıra müfevvaz ola vâkıf-ı müşârun-ileyh meblağ-ı merkūmu meşrûta üzere vakfetmiş olup sâbıkā müfettişü’l-evkāf olan merhûm Abdürrezzak Efendi imzâsıyla mümzât vakfiyye-i ma‘mûlün-bihâsı dahi tahrîr olunup vakfiyye-i ma‘mûlün-bihâ-yı mezbûreyi nâzır-ı mûmâ-ileyh Ali Ağa Tophane’de sâkin olduğu menzilinde zabt ve hıfzında iken menzil-i mezkûr bi’l-külliye muhterik olup vakfiyye-i mezkûre dahi muhterika oldukdan sonra sûreti nice müddet sicillâtda tetebbu‘ olunup bulunmamağın ba‘de’l-yevm vakf-ı mezbûr husûsunda yine şurût-ı mezkûre üzere amel olunmak için müceddeden vakfiyye tahrîr olunması matlûbumdur dedikde mütevellî-i mersûmun vech-i meşrûh üzere olan takrîri bi’t-taleb ketb ve yed-i tâlibe def‘ olundu ki lede’l-hâce müzekkir-i mâ-cerâ ola. Tahrîren fî-evâili Şa‘bâni’l-mu‘azzam li-sene selâse ve selâsîn ve elf. Şühûdü’l-hâl: Ali Ağa b. Abdullah el-müteferrika tâbi‘-i Nakkāş Hasan Paşa, Rıdvan Çavuş b. Abdullah Tâbi‘-i Nakkāş Hasan Paşa, Süleyman Bey Kethüdâ-i teberdârân Hasan Paşa, Mustafa Efendi b. ( ) İmâm-ı Nakkāş Hasan Paşa, Şeyh Ömer Efendi, Tâbi‘-i Mehmed Paşa, Mehmed Çelebi b. Abdülgani, Hasan Çelebi b. Hüseyin Mimâr-ı Ayasofya, Ali Çelebi b. Halil Mi‘mâr-ı Haremeyn-i Muhteremeyn, Molla Mehmed b. Pîrî el-müsta‘id ve gayruhüm.