Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 425 Hüküm no: 368 Orijinal metin no: [120a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kamer Hatun Vakfı olup vakfiyesi gereği Zamane Hatun’un evladı tasarrufunda olan vakıf eve Ramazan Bey b. Abdülkerim’in müdahalesinin engellenmesi Sâhibü hâze’l-kitâb Zamâne bt. Abdullah tarafından husûs-ı âti’z-zikre vekîl-i şer‘î olan zevci Yedikule Bölükbaşısı Hüseyin Bey b. Abdullah nâm kimesne meclis-i şer‘-i şerîfde ebnâ-i sipâhiyândan Maden Bey demekle ma‘rûf Ramazan Bey b. Abdülkerim mahzarında vekâleten da‘vâ kılıp mahmiye-i Kostantıniyye mahallâtından el-Hâcce Hatun mahallesinde vâki‘ bir tarafı mezbûr Maden Bey mülkü ve bir tarafı hîn-i vakfda Rabia Hatun bt. Mustafa ve hâlâ Ömer mülkü ve bir tarafı Mustafa Çelebi b. Mahmud mülkü ve bir tarafı tarîk-i âm ile mahdûd olup ulvî ve süflî beyti ve bir fevkānî beyti müştemil olan menzil Kamer nâm hatunun mülkü olup mülkünde iken evvelâ nefsine ba‘de vefâtihâ merkūm Maden Bey menzili tarafında vâki‘ olan beyteyn-i mezbûreteyn merkūme Zamâne Hatun’a mersûme Rabia Hatun’un menzili tarafında olan sâlifü’z-zikr fevkānî odayı Mehmed Ağa nâm kimesneye ve Zamâne Hatun ve Mehmed Ağa’nın vefâtlarından sonra mezbûra Zamâne’nin evlâdına evlâd-ı evlâdına Zamâne evlâdı münkarız oldukdan sonra Medîne-i Münevvere fukarâsına vakfedip hâlâ mezkûr Mehmed Ağa vefât etmeğin onun meşrûtu olan mârrü’l-beyân fevkānî bir bâb oda ber-mûceb-i şart-ı vâkıfe-i mezbûre benden mütevellid mezkûre Zamâne’nin sadri oğlu Receb’e ve sadriye kızı Havvâ’ya intikāl edip velâyeten biz zabt eder iken merkūm Ramazan Bey müdâhaleden hâlî değildir suâl olunup dahlden men‘ olunmak matlûbumdur dedikde gıbbe’s-suâl mezbûr Ramazan Bey cevâb verip merkūme Kamer Hatun menzil-i mezbûru minvâl-i meşrûh üzere benim huzûrumda vakfedip ben dahi vakfiyye-i ma‘mûlün-bihâsı mazmûnuna şâhid idim lâkin vakfiyyenin mazmûnu hâtırımdan gidip merkūm Ali Ağa’dan sonra Haremeyn Vakfı’na intikāl eder deyu mütevellîsinden altı yüz akçe icâre-i mu‘accele ve beher mâh onar akçe ücret-i müeccele ile istîcâr eyleyip hâlâ vakfiyye-i ma‘mûlün-bihâsına nazar ettiğimde mazmûnu mezbûr Hüseyin Bey’in takrîr-i meşrûhuna mutâbık bulunup mazmûn-ı mezbûr dahi hakīkatde hak olduğu yine benim hâtırıma hutûr etmeğin min-ba‘d zikr olunan fevkānî odaya dahl etmeyecek oldum deyu merkūm oda Zamâne evlâdının meşrûtu olduğuna i‘tirâf edicek dahlden men‘ olundu. Fî-evâsıtı Zilka‘de li-sene selâse ve selâsîn ve elf. Şühûdü’l-hâl: Halil Efendi el-müderris, Yusuf b. Musa er-râcil, Mehmed Çelebi b. Abdülgani, Abdülhalim Efendi b. Mehmed el-müderris,