Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 426 Hüküm no: 369 Orijinal metin no: [120a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’ndan Hoşkadem mahallesinde bulunan kürkçü dükkanının kiracısı Mişo v. Dimo’nun hüccet talebi Sâhibü hâze’l-kitâb Nasârâ tâifesinden Mişo v. Dimo nâm Nasrâni meclis-i şer‘-i şerîfe hâzır olup takrîr-i kelâm edip Haremeyn-i Şerîfeyn Evkāfı’ndan olup mahmiye-i Kostantıniyye’de Şehzâde Sultan Mehmed Hân Câmi‘-i şerîfi kurbünde el-Hâc Hoşkadem mahallesinde vâki‘ lede’l-ahâlî ve’l-cîrân ma‘lûmetü’l-hudûd dekâkînden bir bâb kürkçü dükkânını bundan akdem vakf-ı mezbûr mütevellîsi Hasan Bey b. ( ) nâm bevvâb-ı sultânî icâre-i mu‘accele ve ayda altmış akçe ücret-i müeccele ile bana îcâr edip ben dahi minvâl-i meşrûh üzere istîcâr ve kabûl ettiğimden sonra yedime imzâsıyla mümzâ ve hatemiyle mahtûm ve bin yirmi Muharremü’l-harâmı evâili ile müverrah temessük vermişdir. Nazar olunup mûcebince kıbel-i şer‘-i şerîfden yedime hüccet-i şer‘iyye verilmesi matlûbumdur deyu temessük-i mezbûru ibrâz edip nazar olundukda min-külli’l-vücûh temessük-i mesfûrun mazmûnu mukırr-ı mezbûrun ikrârına mutâbık bulunmağın li-ecli’t-temessük bu hurûf ketb olunup yed-i tâlibe def‘ olundu. Tahrîren fî-evâhiri Zilhicceti’ş-şerîfe li-sene selâse ve selâsîn ve elf. Şühûdü’l-hâl: es-Sâbıkūn