Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 426 Hüküm no: 370 Orijinal metin no: [120a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabaş mahallesinde Haremeyn Evkafı’ndan olan evin kiracısı Davud Bey b. Mehmed’in tamir için yaptığı masrafın tespiti Mahmiye-i Kostantıniyye mahallâtından Karabaş mahallesi sükkânından bevvâbi-yi sultânî Davud Bey b. Mehmed meclis-i şer‘-i şerîfe hâzır olup takrîr-i kelâm edip Haremeyn-i Şerîfeyn Evkāfı’ndan olup mahalle-i merkūmeden bir cânibi Karabaş Mehmedî ve bir cânibi Hürrem Çavuş vakfı ve bir cânibi es-Seyyid Ahmed Çelebi mutasarrıfı olduğu Haremeyn vakfı ve bir cânibi tarîk-i âm ile mahdûd olup icâre-i mu‘accele ve yevmî iki akçe ücret-i müeccele ile mutasarrıf olduğum menzil harâba müşrif olup bundan akdem vakf-ı mezbûr mütevellîsi Hasan Bey ebniyem icâre-i mu‘accelemden mahsûb ola deyu izin vermeğin lâzım olan mevâzi‘in bazısını tecdîd ve bazısını meremmet eyledim kıbel-i şer‘den üzerine varılıp tahmîn olup harcım icâre-i mu‘acceleme zam oluna dedikde savb-ı şer‘-i şerîfden Mevlânâ Halil Efendi ve Hâssa mi‘mârlardan Hasan Çelebi b. Hüseyin irsâl olunup zeyl-i kitâbda mastûretü’l-esâmî olan Müslimîn ile mahall-i mezbûrun üzerine varılıp hâli vakf-ı mezbûr mütevellîsi ebnâ-i sipâhiyândan Ali Çelebi b. Mehmed muvâcehesinde keşf ettiklerinde fi’l-hakīka elli zirâ‘ tahta havlu müceddeden mebnî olup beher zirâ‘ yirmi beşerden bin beş yüz elli akçe yirmi dört zirâ‘ taş sedd-i cedîd altmış akçeden bin dört yüz kırk akçe yüz kırk dört zirâ‘ sakf aktarması mertek pedavrasıyla on ikişerden bin yedi yüz yirmi sekiz akçe pencere çârçûbe ile yüz seksen akçe asma kerevedi yedi yüz akçe duvar içinde Arab kanatlı dokuz yüz akçe sofa üzerinde olan çatma trabuzanıyla bin akçe kemerli oda kapısı üç yüz akçe otuz zirâ‘ sakf dahi pedavrasıyla beş yüz akçe yirmi zirâ‘ havâle perdesi dört yüz akçe yirmi dört zirâ‘ yunma taşı sed dokuz yüz akçe on iki zirâ‘ taş duvar meremmeti kırkardan dört yüz seksen akçe yirmi iki zirâ‘ taş duvar ellişerden bin iki yüz on akçe zukāk kapısı çârçûbesiyle kilidiyle sekiz yüz akçe cedîd kerevid trabuzanıyla dört yüz yetmiş sekiz akçe diğer asma kerevidi dört yüz akçe sekiz zirâ‘ sed meremmeti iki yüz akçe mahlût taş kaldırım üç yüz akçe cem‘an on üç bin dört yüz altmış altı akçe olup noksânıyla olmak mümkün değildir deyu ittifâk ettiklerinde vâki‘ hâli mevlânâ-yı mezbûr mahallinde tahrîr edip meclis-i şer‘a inhâ ekmeğin mâ-hüve’l-vâkı‘ bi’t-taleb ketb olunup yed-i tâlibe def‘ [olundu]. Tahrîren fî-evâsıtı Şevvâli’l-mükerrem li-sene selâse ve selâsîn ve elf. Şühûdü’l-hâl: Abbas Ahmed Efendi el-kādî, es-Seyyid Ahmed Çelebi el-cündî, Mehmed Efendi b. İbrahim el-imâm, Ramazan Efendi b. Mehmed, Kasım b. Abdullah, İbrahim b. Mustafa el-müezzin, Hasan b. Mustafa el-müezzin, İsmail Çelebi b. Kuyumcu Hüseyin, Hasan b. Mehmed el-mütevellî?, Mehmed b. Kasım er-râcil.