Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 435 Hüküm no: 377 Orijinal metin no: [123b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mâhıtâb bt. Abdullah’ın tasarruf hakkı kendine ait olan vakıf evi Serkis v. Aydın’a kiraya vererek gelirini Haremeyn Vakfı’na hibe etmesi Mâhıtâb bt. Abdullah nâm Hatun meclis-i şer‘-i şerîfde sâhibü hâze’l-kitâb Serkis v. Aydın mahzarında takrîr-i kelâm kılıp mahmiye-i Kostantıniyye’de Kâtib Kasım mahallesinde Saraylı merhûme Suriyye nâm Hatun evvelâ nefsine ba‘de vefâtiha zevci Ali Ağa’ya, mezbûr Ali Ağa’dan sonra bana, benden sonra Medîne-i Münevvere fukarâsına vakf ettiği inde’l-ahâlî ve’l-cîrân ma‘lûmetü’l-hudûd menzil tasarrufunun nevbeti hâlâ benim hakkım iken merkūm Serkis bana yetmiş bin akçe icâre-i mu‘accele vermek üzere menzil-i mezbûru istîcâra tâlib olmağın hakk-ı süknâmı Medîne-i Münevvere fukarâsına hibe edip mütevellîsi olan hâzır bi’l-meclis Ali Bey’e teslîm eyledim, ol dahi merkūm Serkis îcâr ettikden sonra mezkûr Serkis yetmiş bin akçe icâre-i mu‘acceleyi bana teslîm edip ben dahi bi’t-tamâm kabz ve tesellüm ettim, eğer ba‘de’l-yevm hibe-i mezbûreden rücû‘ edip menzil-i mezbûru meşrûtiyet üzere tasarruf murâd edersem mezbûr Serkis hâlâ bana verdiği yetmiş bin akçe icâre-i mu‘acceleyi geri merkūm Serkis[‘e] vermesin ta‘ahhüd eyledim dedikde husûs-ı mezbûr istiftâ olunup fetvâ-yı şerîfeden “Hind kendüye gallesi meşrût olan vakıf menzili Amr’a îcâr ettikde Amr’dan yetmiş bin akçe icâre-i mu‘accele almış olup ba‘dehû Hind-i mezbûre menzil-i merkūmu Amr’dan almak murâd edicek, aldığı yetmiş bin akçe icâre-i mu‘acceleyi Amr’a vermedikçe menzili Amr yedinden alıp kendisi tasarrufa kādir olur mu?” deyu suâl olunup cevâb-ı bâ-savâbında “olmaz” deyu buyurulmuş olmağın gıbbe’t-tasdîk fetvâ-yı şerîfe mûcebince işbu hurûf ber-sebîl-i temessük ketb olunup yed-i tâlibe def‘ olundu. Tahrîren fî-evâhiri Zilka‘deti’ş-şerîfe li-sene selâse ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Abdülhalim Efendi b. Şeyh Mehmed el-müderris, Hüseyin Efendi b. Abdullah, Mehmed Çelebi b. Abdulkadir, Hasan Çelebi b. Hüseyin Mi‘mâr-ı Ayasofya-i Kebîr, Mehmed b. Abdullah, Ali Çelebi b. Halil el-mi‘mâr-ı Haremeyn, Hüsrev b. Abdullah, Kuşakçı Hacı, Mollâ Mehmed b. Beşiri el-müsta‘id.