Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 435 Hüküm no: 378 Orijinal metin no: [123b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Lütfi mahallesinden Mehmed b. Receb’in tasarrufunda olan vakıf evi tamir ettirmesi Mahrûsa-i Galata hâricinde kasaba-i Kasım Paşa’da Sarı Lütfi mahallesi sâkinlerinden Mehmed b. Receb nâm kimesne meclis-i şer‘de takrîr-i kelâm edip mahalle-i mezbûrede vâki‘ Medîne-i Münevvere Evkāfı’ndan olup ahâlîsine intimâ ile ta‘rîf ve tavsîfden müstağnî icâre-i mu‘accele ve müeccele ile tasarrufumda olan vakıf menzil mürûr-ı eyyâm ile harâba müşrif olup süknâya kābiliyeti olmamağın imâret ve meremmetine sarf ettiğim akçe icâre-i mu‘acceleme mahsûb olmak üzere evkāf-ı mezbûre mütevellîsi olan hâzır bi’l-meclis fahrü’l-a‘yân Mehmed Bey b. Ali nâm kimesne izniyle bir dolma duvar ve tahta bendin ve duvar yerine olan tahta perdenin yirmi dokuz tahtasın ihdâs etmişdim, hâlâ kıbel-i şer‘den üzerine varılıp ebniye-i muhdesenin tahammülünü ve bennâ zirâ‘ıyla elli üç zirâ‘ ihdâs olunacak tahta havlusu ne mikdâr akçe ile olur, tahmîn olunmasın taleb ederim dedikde kıbel-i şer‘den umdetü’l-müderrisîn Mevlânâ Abdurrahman Efendi ve hâssa mi‘mârlardan Üstâd Hasan b. Hüseyin nâm kimesne ile ebniye ve sukūfa vukūfu olup zeyl-i kitâbda mastûrü’l-esâmî olan bî-garaz Müslimîn irsâl olunup onlar dahi üzerine varıp mu‘âyene ve müşâhede ettiklerinde fi’l-vâki‘ menzil-i mezbûrda ihdâs olunan ebniye-i mezbûr ile müceddeden ihdâs olunacak tahta havlusuna sekiz yüz akçe nıkzından gayrı on iki bin iki yüz akçe ki mecmû‘u on üç bin akçeye tahammülü vardır deyu tahmîn-i sahîh ile tahmîn ettiklerinde mütevellî-i mezbûr dahi meblağ-ı mezbûr on üç bin akçe vakfa nâfi‘ olmağla icâre-i [124a] mu‘accelesine mahsûb ettiğin mevlânâ-yı mezbûr mahallinde tahrîr edip ba‘dehû meclis-i şer‘a gelip haber vermeğin mâ-vaka‘a bi’t-taleb ketb ve terkīm olunup tâlibi yedine vaz‘ olundu. Hurrire fî-evâhiri Muharremi’l-harâm sene 1034 Şühûdü’l-hâl: Mehmed b. Abdullah, Veli b. el-Hâc Dede?, Receb b. Aydın, Şa‘ban b. Hamza, el-Hâc Mustafa b. Abdullah, Bâli b. Hasan.