Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 436 Hüküm no: 379 Orijinal metin no: [124a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait Murat Paşa-yı Atik mahallesindeki evin Rabia bt. Abdullah’a kiraya verilmesi Zümre-i sipâh-ı muzaffer-penâhdan olup hâlâ Haremeyn-i Muhteremeyn Vakfı’na bi’l-fi‘il mütevellî olan fahrü’l-a‘yân Ali Bey v. Mehmed nâm kimesne meclis-i şer‘-i şerîfde işbu râfi‘atü’l-kitâb Rabia bt. Abdullah nâm Hatun mahzarında ikrâr ve takrîr-i kelâm edip vakf-ı mezbûrdan mahrûsa-i İstanbul’da Murad Paşa-yı Atîk mahallesinde vâki‘ dört tarafı Mustafa Çelebi b. Şemseddin ve mefharu erbâbi’t-tahrîr ve’l-kalem Muhammed Efendi mülkleri ve bir tarafı tarîk-i âmma müntehî ulvâ ve süflâlı büyût-ı müte‘addide ve ahırı ve bi’r-i mâ ve kenîfi ve muhavvatayı müştemil olan vakıf menzili müzâyede olunup ragabât-ı nâs inkıtâ‘ından sonra mezkûre Rabia üzerinde râyic fi’l-vakt otuz beş bin akçede karâr edip ziyâde ile taleb-i âhar bulunmayıp semen-i mezbûr semen-i misli idiği ebniye ve sukūfa vukūfu olup zeyl-i kitâbda mastûrü’l-esâmî olan bî-garaz Müslimîn haberiyle mütehakkık olmağın meblağ-ı mezbûr otuz beş bin akçe icâre-i mu‘accele ve yevmî iki akçe ücret-i müeccele ile bin otuz üç târîhinin Zilhiccesi evâhirinde mezbûre Rabia’ya îcâr edip ol dahi vech-i muharrer üzere istîcâr ve kabûl ettikden sonra meblağ-ı mezkûr otuz beş bin akçeyi tevliyetim hasebi ile vakıf için alıp kabz eyleyip kendi mâlından imâret ve meremmete ve keyfe mâ yeşâ tasarrufuna izin verdim dedikde gıbbe’t-tasdîk mâ-vaka‘a bi’t-taleb ketb olundu. Tahrîren fî-gurreti Saferi’l-hayr li-sene erba‘a ve selâsîn ve elf. Şühûdü’l-hâl: ( )