Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 97 Hüküm no: 14 Orijinal metin no: [2b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye bt. Abdullah’ın evini Mustafa Beşe b. Hasan’a sattığı Mahmiye-i İstanbul’da Hatice Sultan mahallesinde sâkine Râziye bt. Abdullah nâm hâtun meclis-i şer‘-i şerîf-i lâzımü’t-teşrîfde işbu bâ‘isü’l-kitâb Mustafa Beşe b. Hasan nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezbûrede vâki‘ bir tarafdan Medîne-i Münevvere vakfı’na ve bir tarafdan Âişe nâm hâtun mülküne ve bir tarafdan ba‘zen oğlum Hüseyin Çelebi mülküne ve ba‘zen kendi mülküme ve bir tarafdan tarîk-i âm ile mahdûd dâhiliyyesi üç bâb tahtânî oda ve bir sofa ve bir matbah ve mahtab ve bir gasilhâne ve bir kenîf ve bir mikdâr bahçe ve hâriciyyesi iki bâb fevkānî oda ve önünde bir sofa ve bir bâb tahtânî oda ve bir ahır ve kenîfi müştemil mülk menzilimi cümle tevâbi‘ [ve] levâhıkıyla mezbûr Mustafa Beşe’ye altı yüz elli nakid esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve tesellüm ve kabûl ettikden sonra semeni olan meblağ-ı mezbûr altı yüz elli esedî guruşu mezbûr Mustafa Beşe yedinden tamâmen ahz u kabz edip ba‘de’l-yevm menzil-i mahdûd-ı mezbûr merkūm Mustafa Beşe’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-ışrîn min Rebî‘ilâhir li sene [10]77. Şuhûdü’l-hâl: Sâbikūn.