Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 437 Hüküm no: 380 Orijinal metin no: [124a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daye Emine Hatun Vakfı mütevellisi Ali Çelebi b. İlyas’ın vakfın paralarının geçerli rayiç üzere hesaplanmasını istemesi Târîh-i kitâb şehrinin beşinci günü fermân-ı cihân-mutâ‘ ile kesik ve züyûf akçenin te‘âtîsi memnû‘ ve altın yüz yirmiden ve guruş seksener akçeden ziyâdeye râyic olması merfû‘ olmağla merhûme Daye Emine Hatun Vakfı’ndan yüz otuz iki bin akçe nükūdun hâlâ mütevellîsi olup Dergâh-ı Âlî bevvâblarından olan işbu bâ‘isü’l-kitâb Ali Çelebi b. İlyas meclis-i şer‘de takrîr-i kelâm edip hâlâ mütevellîsi olduğum vakf-ı mezbûrun asl-ı mâlından olup târîh-i kitâb Muharremi evâilinde zimemi erbâbından üçer yüz akçeye râyic iken ahz u kabz etmekle hâlâ yedimde mevcûd olan dört yüz kırk kıt‘a kâmil guruşun ber-mûceb-i fermân-ı âlî râyic olduğu üzere geri tahrîr olunması matlûbumdur dedikde deyu zikr olunan dört yüz kırk kıt‘a guruşu meclis-i şer‘a ihzâr edip mu‘âyene ve müşâhede olundukdan sonra fi’l-vâki‘ zikri sebk eden guruş vakfın olup hîle ve hud‘a ve âhardan halt etmediğin hüddâm-ı vakfın sikātı haber verdiğinden mâ‘adâ half billâhi te‘âlâ etmekle mütehakkık olmağın hâlâ râyic olduğu üzere cümlesi otuz beş bin iki yüz akçe ve hesâb-ı mesfûr üzere geri doksan altı bin sekiz yüz akçe olduğu mukarrer olucak, mâ-vaka‘a bi’t-taleb hıfzan li’l-makāl ketb [olundu]. Hurrire fi’l-yevmi’s-sâmin min-şehri Saferi’l-hayr li-sene erba‘a ve selâsîn ve elf. Şühûdü’l-hâl: Halil Efendi b. Mahmud, Abdülhalim Çelebi b. eş-Şeyh Mehmed, Abdurrahman Efendi b. Hüseyin, Mustafa Bey b. Yusuf.