Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 437 Hüküm no: 381 Orijinal metin no: [124a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı mütevellisi Ali Bey b. Mehmed Bey’in Kalenderhane mahallesindeki vakfa ait evi Hacı Mustafa ve Hacı Emrullah b. Bayram’a kiraya vermesi Hâlâ Haremeyn-i Muhteremeyn Evkāfı’na bi’l-fi‘il mütevellî olan zümre-i sipâh-ı muzaffer-penâhdan Ali Bey b. Mehmed Bey meclis-i şer‘de râfi‘ayi’l-kitâb el-Hâc Mustafa ve el-Hâc Emrullah b. Bayram nâm kimesneler mahzarında ikrâr ve takrîr-i kelâm edip mahrûsa-i İstanbul’da Kalenderhane mahallesinde vâki‘ Haremeyn Evkāfı’ndan ahâlîsine intimâ ile ta‘rîf ve tavsîfden müstağnî bi-hesâb-ı şatrancî dört yüz yetmiş zirâ‘ arsa üzerinde tahtânî iki evi ve iki sofa ve bi’r-i mâ ve kenîfin meşrûtiyet üzere mutasarrıfı olan merhûm Yahya Çelebi fevt olmağla evlâdı olmayıp vakfa intikāl etmeğin müzâyede olunup ragabât-ı nâs inkıtâ‘ından sonra mezbûrân üzerinde râyic fi’l-vakt yirmi beş [bin] akçede karâr edip ziyâde ile tâlib-i âhar bulunmadığı ecilden yirmi beş bin akçe icâre-i mu‘accele ve yevmî üçer akçe icâre-i müeccele ve lâzım gelen meremmeti kendi mâlından etmek üzere mezbûrân Mustafa ve el-Hâc Emrullah’a îcâr edip onlar dahi vech-i muharrer üzere istîcâr ve kabûl ettiklerinden sonra icâre-i mu‘accele nâmına olan meblağ-ı mesfûr yirmi beş bin akçeyi tevliyyetim hasebi ile vakıf için [124b] yedlerinden bi’t-tamâm alıp kabz eyleyip keyfe mâ yeşâ ve yahtâr tasarruflarına izin verdim dedikde gıbbe’t-tasdîk mâ-vaka‘a bi’t-taleb ketb ve terkīm olundu. Hurrire fî-evâsıtı şehri Saferi’l-hayr li-sene erba‘a ve selâsîn ve elf. Şühûdü’l-hâl: Es-Seyyid Osman Efendi b. es-Seyyid Veli el-imâm, Seydi Ali b. Seydi Veli, Mehmed Çelebi el-kâtib, el-Hâc Osman Beşe el-müezzin, Hacı Şa‘ban b. el-Hâc Kalender, el-Hâc Ali b. ( ), el-Hâc Hızır b. Osman, Ömer Beşe b. Osman, Receb b. Mehmed.