Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 438 Hüküm no: 382 Orijinal metin no: [124b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kamile bt. Abdullah’ın, Kamer Hatun adlı hayır sahibinin ev ve arsasını vakfedip tevliyyetini de kendisine verdiğini ispatlaması Mahrûsa-i İstanbul’da el-Hâc İvaz mahallesi sâkinelerinden olup vakf-ı âti’z-zikre meşrûtiyet üzere mütevelliye olan Kamile bt. Abdullah nâm Hatun tarafından husûs-ı âtîye vekîl olup vech-i mu‘teber üzere vekâleti sâbite olan sadri oğlu umdetü’l-müderrisîni’l-kirâm Mevlânâ Mustafa Efendi b. Mahmud meclis-i şer‘-i şerîfde yine mahalle-i merkūmede vâki‘ merhûm Kılıçcı Mahmud Vakfı’na meşrûtiyet üzere mütevellî olmak ile arsa-i muhtelleye vâzı‘-ı yed ettiği şer‘an sâbit olan Mahmud b. Abdullah nâm kimesne mahzarında bi’l-vekâle takrîr-i da‘vâ edip merhûme sâhibetü’l-hayrât ve’l-hasenât Kamer Hatun mahalle-i mezbûrede vâki‘ bir tarafı Hasan Bey b. Abdullah mülküyle ve bir tarafı merhûm-ı merkūm Kılıçcı Mahmud utekāsına vakf ettiği menzil ile ve tarafeyni tarîk-i âm ile mahdûd olan tahtânî iki beyti ve zikr olunan hudûd dâhilinde menzil-i merkūmun muhavvatasından tûlen on sekiz zirâ‘ ve arzen yedi zirâ‘ arsasını yirmi sekiz yıl mukaddem vakf-ı sahîh-i şer‘î ile vakf edip süknâsını vakfiye-i ma‘mûlün-bihâsında mastûr olduğu üzere müvekkilem mezbûre Kamile’ye ve ba‘dehâ evlâdına ve evlâd-ı evlâdına batnen ba‘de batnin ve ba‘dehüm mahalle-i mezbûre mescidi müezzinine ve tevliyyeti içinde sâkin olana şart etmeğin hâlâ müvekkilem menzil-i mezbûra mutasarrıfe olup arsa-i mezkûrenin dahi ber-mûceb-i şart-ı vâkıf tasarrufuna müstahıkka iken mezbûr Mehmed mütevellîsi olduğu merhûm-ı mesfûr Kılıçcı Mahmud’un vakfından olup utekāsına şart ettiği menzile ittisâli olmağın arsa-i merkūmeye bî-vech vaz‘-ı yed etmekle müvekkilemi zikr olunan arsanın vakfiyet üzere tasarrufundan men‘ eder, suâl olunup takrîri ve arsa-i merkūmeden kasr-ı yedine tenbîh olunması matlûbumdur deyu bin altı Şevvâli evâsıtı ile müverreha mahrûsa-i mezbûrede hilâfeten müvellâ olan Mevlânâ Abdurrahman Efendi b. Seyfi’nin hat ve hatemi ile mümzât ve mahtûme mazmûnu takrîrine mutâbık vakfiye ibrâz etmeğin suâl olundukda mütevellî-i mezbûr Mehmed cevâbında fi’l-vâki‘ târîh-i mezkûrda merhûme-i mesfûre Kamer Hatun vech-i muharrer vakf ve habs ve şurût ve kuyûdun tahsîs üzere şart-ı vakf ettiği ancak menzil-i sâlifü’t-tafsîl vakf ve habs şurût ve kuyûdun tahsîs ve tansîs eyledikden sonra arsa-i mezbûreyi vakfa idhâl etmedi, merkūme Kamer’in mülkünde iken fevt oldukda verâseti mezkûr Mahmud’a münhasıra olmağla arsa-i mezbûre kendüye intikāl ettikden sonra mezbûr Mahmud dahi hayâtında iki yıl mukaddem bâlâda hudûd-ı münâsibi ile ânifen zikri sebk eden menzil ile arsa-i merkūmenin süknâsını utekāsına ve tevliyyeti bana şart-ı vakf etmişdir deyu tevliyyeti hasebiyle arsa-i mezbûreye vâzı‘ü’l-yed idiği mukır, lâkin merhûme-i mezbûre Kamer menzil-i mârru’z-zikr ile arsa-i mezbûreyi ma‘an vakf ettiğini münkir olucak, vekîl-i mezbûrdan takrîrine mutâbık beyyine taleb olundukda udûl-ı Müslimîn ve fuhûl-ı muvahhidînden olup mahalle-i mezbûre sâkinlerinden Mustafa Bey b. Abdullah ve Sinan b. Mahmud nâm kimesneler ile Fâtıma bt. İbrahim ve Belkıs bt. Abdullah nâm Hatunlar li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ bizim huzûrumuzda mezbûre Kamer târîh-i mezkûrda menzil-i mezbûr ile arsa-i mesfûreyi vakf-ı sahîh-i şer‘le vakf edip süknâsını vakfiye-i ma‘mûlün-bihâsında mastûr olduğu üzere müvekkile-i mezbûre Kamile’ye ve ba‘dehâ evlâdına ve elvâd-ı evlâdına ve ba‘dehüm mahalle-i mezbûre mescidi müezzinine şart etmişdir, biz bu husûsa şâhidleriz, şehâdet dahi ederiz [125a] deyu edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a oldukdan sonra mûcebiyle hüküm birle mâ-vaka‘a bi’t-taleb ketb olundu. Hurrire fî-evâsıtı şehri Saferi’l-hayr li-sene erba‘a ve selâsîn ve elf. Şühûdü’l-hâl: Mehmed b. Ali, Mahmud Bey b. Abdullah, Zülfikār Bey b. Abdullah, Ali b. Abdullah, Perver b. Abdullah, Mevlânâ Halil Efendi, Abdülhâlık Çelebi b. Şeyh Mehmed, Siyavuş b. Abdullah, Yusuf b. Abdullah. Şâhidlerin adline şehâdet eden Zülfikār b. Abdullah ve Ali Halîfe b. ( ) el-müezzin mezbûrân …? deyu tezkiye ettiler.