Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 440 Hüküm no: 384 Orijinal metin no: [125a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa’daki Haremeyn-i Muhteremeyn Parekendesi Vakfı mütevellisi Şaban Bey b. Abdülmennan’ın vakfın paralarının yeni rayiç üzere hesaplanmasını istemesi Târîh-i kitâb Safer’inin beşinci günü fermân-ı âlîşân ile cedîd ve ceyyid akçe zuhûr etmekle kesik ve züyûf akçenin te‘âtîsi memnû‘ ve altın yüz yirmiden ve guruş seksenerden ve Osmanî üçer akçeden ziyâdeye râyic olması merfû‘ olmağla mahrûsa-i Bursa tarafında vâki‘ Haremeyn-i Muhteremeyn Perâkendesi Vakfı’na bi’l-fi‘il mütevellî olan sipâh-ı muzaffer-penâhdan fakrü’l-akrân Şa‘ban Bey b. Abdülmennan mahfil-i kazâda ikrâr ve takrîr-i kelâm edip mütevellîsi olduğum vakf-ı mezbûrun icârât ve a‘şâr ve rüsûmundan bin otuz üç senesinde cem‘ ve tahsîl etmekle yedimde mevcûd olan altın ve guruşun geri tahrîr olunması matlûbumdur deyu ikişer yüz ellişere alınmış altı yüz on dört kıt‘a ve nısf guruşu üçer yüz seksenere alınmış guruş on aded altını meclis-i şer‘a ihzâr edip mu‘âyene olundukda fi’l-vâki‘ zikr olunan guruş ve altın vakf-ı mezbûr avâidinden ahz u kabz olunup âhardan hîle ve hud‘a etmediğine hüddâm-ı vakfın sikātı haberinden mâ‘adâ half billâhi te‘âlâ etmekle mütehakkık oldukdan sonra meblağ-ı mezbûrun cümlesi hâlen râyic olduğu üzere elli bin dört yüz seksen akçe ve hesâb-ı mesfûr üzere mecmû‘unun geri yüz yedi bin üç yüz yirmi beş akçe olmağın vâki‘ hâl hıfzan li’l-makāl ketb olundu. Tahrîren fî ( ) li-sene erba‘a ve selâsîn ve elf. Şühûdü’l-hâl: Ali Ağa b. İlyas el-bevvâbü’s-sultânî, Mustafa Bey b. Yusuf el-bevvâbü’s-sultânî, Hasan Çelebi b. Hüseyin el-mi‘mâr, Siyavuş b. Abdullah, Yusuf b. Abdullah ve gayruhüm.