Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 441 Hüküm no: 385 Orijinal metin no: [125b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalenderhane mahallesinden Rahime bt. Abdullah’ın Haremeyn-i Muhteremeyn Vakfı mütevellisi Ömer Ağa b. Mustafa tarafından arsasının gasbedildiği iddiası Mahrûsa-i İstanbul’da vâki‘ Kalenderhane mahallesi sâkinlerinden Rahime bt. Abdullah nâm Hatun mahfil-i kazâda merhûme Âişe Hatun bt. Mehmed Medîne-i Münevvere fukarâsına vakf ettiği menzile Haremeyn-i Muhteremeyn Vakfı’na bi’l-fi‘il mütevellî olmağla vâzı‘ü’l-yed olan Ömer Ağa b. Mustafa mahzarında üzerine takrîr-i da‘vâ edip mezbûr Ömer Ağa tûlen ve arzen otuz dört zirâ‘ mülk arsamı gasb edip üzerine vakıf için kenîf ihdâs etmişdir, suâl olunup kasr-ı yed etmesi matlûbumdur dedikde gıbbe’s-suâl mütevellî-i mezbûr arsa-i mezbûre vakf olmağla vaz‘-ı yed ettiğini mukır, lâkin mülkünü münkir olmağın müdde‘iye-i mezbûreden sıdk-ı makāline beyyine taleb olundukda kirâren ityân-ı beyyineden âcize olduğundan mâ‘adâ beyyinem dahi yokdur deyu i‘tirâf etmeğin arsa-i mezbûre vakfiyet üzere ibkā olunup mâ-vaka‘a bi’t-taleb ketb olundu. Hurrire fî-evâhiri şehri Rebî‘i’l-âhir li-sene erba‘a ve selâsîn ve elf. Şühûdü’l-hâl: Süleyman Ağa b. Abdullah, Mehmed Çavuş b. Emrullah, Mehmed Subaşı b. Salih, Mehmed Ağa b. İbrahim Ağa, Hüseyin Çelebi b. ( ).