Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 441 Hüküm no: 386 Orijinal metin no: [125b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfına ait evin Salih Ağa b. Mehmed’e kiraya verilmesi Haremeyn-i Muhteremeyn Vakfı’na bi’l-fi‘il mütevellî olan fahrü’l-akrân Ömer Bey b. ( ) meclis-i şer‘-i şerîfde kıdvetü’l-emâcid ve’l-e‘âzim Salih Ağa b. Mehmed mahzarında ikrâr ve takrîr-i kelâm edip sâhibetü’l-hayrât merhûme Şemsiban bt. Abdullah nâm Hatunun vakfından olup mahrûsa-i Galata hâricinde Süheyl Bey mahallesinde vâki‘ lede’l-ahâlî ve’l-cîrân hudûdu ma‘lûm olmağla ta‘rîf ve tavsîfden müstağnî bi-hesâb-ı şatrancî bennâ zirâ‘ı ile yüz otuz üç zirâ‘ arsa üzerinde mebnî ulüvven ve süflen iki bâb beyti ve mahtab ve matbahı ve dahlîz ve bi’r-i mâyı ve bir kenîf ve bir dükkânı ve ardında bir mikdâr ha[dî]kayı müştemil olan vakıf menzil-i meşrûtün-lehümden herbiri münkarız olup ber-mûceb-i şart-ı vâkıfe Haremeyn’e intikāl ettikde vech-i âtî üzere îcâr vakfa enfa‘ olmağın müzâyede olunup ragabât-ı nâs inkıtâ‘ından sonra otuz bin akçede mûmâ-ileyh Salih üzerinde karâr edip ziyâde ile tâlib-i âhar zuhûr etmeyip semen-i mezbûr semen-i misl idiği ebniye ve sukūfa vukūfu olan bî-garaz Müslimîn haberiyle mütehakkık olucak, ben dahi menzil-i sâbıku’t-tafsîli semen-i mezkûr otuz bin akçe icâre-i mu‘accele ve yevmî bir akçe müeccele ile mesfûr Salih Ağa’ya îcâr edip ol dahi vech-i muharrer üzere istîcâr ve kabûl ettikden sonra meblağ-ı mezbûr otuz bin akçeyi tevliyyetim hasebi ile yedinden bi’t-tamâm alıp kabz eyleyip keyfe mâ yeşâ tasarrufuna izin verdim dedikde gıbbe’t-tasdîki’ş-şer‘î mâ-vaka‘a ketb olundu. Tahrîren fî-evâhiri Rebî‘i’l-âhir li-sene erba‘a ve selâsîn ve elf. Şühûdü’l-hâl: Ebubekir Efendi b. Mehmed el-müderris, Mahmud Efendi b. Yusuf el-kādî, Mustafa b. Ahmed el-müsta‘id, Muslı Çelebi b. el-Hâc Abdi, Abdi Bey b. Hüsam er-râcil, el-Hâc İbrahim, Mustafa Bey b. Müyesser el-cündî ve gayruhüm.