Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 443 Hüküm no: 388 Orijinal metin no: [126a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalenderhane mahallesinden Rahime’nin Haremeyn Vakfı’na ait arsanın bir kısmının mâliki olduğu Mahrûsa-i İstanbul’da vâki‘ Kalenderhane mahallesi sâkinelerinden Rahime bt. Abdullah nâm Hatun mahfil-i kazâda merhûme Âişe Hatun bt. Mehmed Medîne-i Münevvere fukarâsına vakf ettiği menziline Haremeyn-i Muhteremeyn Vakfı’na bi’l-fi‘il mütevellî olmağla vâzı‘ü’l-yed olan Ömer Ağa b. Mustafa mahzarında üzerine takrîr-i da‘vâ edip mezbûr Ömer Ağa tûlen ve arzen kırk zirâ‘ mülk arsamın otuz dört zirâ‘ını gasb edip üzerine vakıf için kenîf ihdâs etmişdir, suâl olunup kasr-ı yed etmesi matlûbumdur dedikde gıbbe’s-suâl mütevellî-i mezbûr arsa-i merkūm vakf olmağla vaz‘-ı yed ettiğini mukır, lâkin mülkünü münkir olmağın müdde‘iye-i mezbûreden sıdk-ı makāline beyyine taleb olundukda kirâren ityân-ı beyyineden âcize olduğundan mâ‘adâ beyyinem dahi yokdur deyu i‘tirâf etmeğin vakfın tasarrufunda olan otuz dört zirâ‘ arsa kemâkân vakfiyet üzere ibkā ve müdde‘iye-i mezbûrenin mülkünde olan altı zirâ‘ arsa dahi mülkiyyet üzere ibkā olunup mâ-vaka‘a bi’t-taleb ketb olundu. Tahrîren fî-evâsıtı Rebî‘i’l-âhir li-sene erba‘a ve selâsîn ve elf. Şühûdü’l-hâl: Ömer Çavuş b. Mustafa Çavuş, Rüstem Subaşı b. Abdullah, Mehmed Subaşı b. Abdullah, Mehmed Ağa b. İbrahim Ağa, Süleyman Ağa b. Abdullah el-müteferrika.