Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 443 Hüküm no: 389 Orijinal metin no: [126a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabaş mahallesinden Bevvab-ı Sultanî Davud Bey b. Mehmed’in tasarrufundaki Haremeyn Evkafı’na ait evi tamir ettirmesi Budur ki, Kostantıniyye mahallâtından Karabaş mahallesi sâkinlerinden Davud Bey b. Mehmed nâm bevvâb-ı sultânî meclis-i şer‘-i şerîfe hâzır olup takrîr-i kelâm edip Haremeyn-i Şerîfeyn Evkāfı’ndan olup mahalle-i merkūmede vâki‘ bir cânibi Karabaş Mescidi ve bir tarafı Hürrem Çavuş Vakfı ve bir tarafı es-Seyyid Ahmed Çelebi mutasarrıf olduğu Haremeyn Vakfı ve bir tarafı tarîk-i âm ile mahdûd olup icâre-i mu‘accele ve yevmî iki akçe ücret-i müeccele ile mutasarrıf olduğum menzil harâba müşrif olup bundan akdem vakf-ı mezbûr mütevellîsi Hasan Bey ebniyem icâre-i mu‘accelemden mahsûb ola deyu izin vermeğin lâzım olan mevâzi‘in bazısını tecdîd ve bazısını meremmet eyledim, kıbel-i şer‘den üzerine varılıp tahmîn olunup harcım icâre-i mu‘accelemden zam [mahsûb] oluna dedikde savb-ı şer‘den Mevlânâ Halil Efendi ve hâssa mi‘mârlardan Hasan Çelebi b. Hüseyin irsâl olunup zeyl-i kitâbda mastûrü’l-esâmî olan Müslimîn ile mahall-i mezbûrun üzerine varılıp hâlâ vakf-ı mezbûr mütevellîsi olan ebnâ-i sipâhiyândan Ali b. Mehmed muvâcehesinde keşf ettiklerinde fi’l-hakīka elli zirâ‘ tahta havlu müceddeden mebnî olup her zirâ‘ı yirmişerden bin beş yüz elli akçe ve yirmi dört zirâ‘ taş-ı sırçaya? altmış akçeden bin dört yüz kırk akçe ve yüz kırk dört zirâ‘ sakf aktarması mertek ve padavrasıyla on ikişerden bin beş yüz yirmi sekiz akçe, pencere çârçûbesine iki yüz seksen akçe, asma kerevidi yedi yüz akçe, duvar içinde Arabî kanatlı dolabına dokuz yüz akçe ve sofa üzerinde olan çatma trabzanlarına bin akçe ve kemerli orta kapısına üç yüz akçe ve otuz zirâ‘ sakf padavrası ile beş yüz akçe ve yirmi zirâ‘ havâle perdesi dört yüz akçe ve yirmi dört zirâ‘ bölme taş seddine dokuz yüz akçe ve on iki zirâ‘ taş duvar meremmeti kırkar akçeden dört yüz seksen akçe ve yirmi iki zirâ‘ tas duvar altışar akçeden bin iki yüz on akçe ve sokak kapısı çârçûbesiyle kilidiyle sekiz yüz akçe ve cedîd kerevid trabzanlarıyla dört yüz yetmiş sekiz akçe, diğer asma kerevid dört yüz akçe ve sekiz zirâ‘ sed meremmeti iki yüz akçe, mahlût taş kaldırım üç yüz akçe cem‘an on üç bin dört yüz altmış altı akçe olduğu noksânıyla almak mümkün değildir deyu ittifâk ettiklerinden vâki‘ hâl mevlânâ-yı mezbûr mahallinde tahrîr edip ba‘dehû meclis-i şer‘a gelip inhâ etmeğin mâ-hüve’l-vâkı‘ bi’t-taleb ketb olundu. Tahrîren fî-evâsıtı Şevvâl li-sene selâse ve selâsîn ve elf. Şühûdü’l-hâl: Fahrü’l-kuzât Yahya? b. Ahmed Efendi, es-Seyyid Ahmed Çelebi el-cündî, Mehmed Efendi b. İbrahim el-imâm, Ramazan Efendi b. Himmet, Kasım b. Abdülmennan, İbrahim [b.] Mustafa el-müezzin, İsmail Çelebi b. Mahmud, Hasan b. Memi ve gayruhüm.