Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 98 Hüküm no: 15 Orijinal metin no: [2b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Kenan’ın câriye bahasından Ömer b. Hızır’daki alacağını tahsil ettiği Mahmiye-i İstanbul’da Koca Mustafa Paşa mahallesi sâkinelerinden Sâliha bt. Kenan nâm hâtunun zevci ve tarafından husûs-ı âti’l-beyân vekîl olup zât-ı mezbûreyi ma‘rifet-i şer‘iyye ile ârifân Mehmed Çelebi b. Nasuh ve Ömer b. Mustafa şehâdetleri ile şer‘an vekâleti sâbite olan Mehmed b. Mustafa nâm kimesne meclis-i şer‘-i şerîfde esirci tâifesinden işbu bâ‘isü’l-kitâb Ömer b. Hızır nâm kimesne mahzarında ikrâr ve takrîr-i kelâm edip müvekkilem mezbûre Sâliha târih-i kitâbdan yirmi iki gün mukaddem evsâfı beynlerinde ma‘lûm Rûsiyyetü’l-asl Gülistan bt. Abdullah nâm câriye-i memlûkesini bey‘ edivermek için mezbûr Ömer’e teslîm edip ol dahi tesellüm ve kabûl eyledikden sonra mezbûr Ömer’in te‘addîsinden nâşî câriye-i mezbûre esir pazarında tahta üzerinde zâyi‘ olmağın câriye-i mezbûreyi mezbûr Ömer’den taleb ve da‘vâ eylediğimde beynimizde münâza‘ât-ı kesîre vukū‘undan sonra muslihûn tavassut edip mezbûr Ömer ile beynimizde kırk esedî guruş üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr kırk esedî guruşu mezbûr Ömer yedinden tamâmen ahz[u] kabz edip câriye-i mezbûreye müte‘allika da‘vâdan mezbûr Ömer’in zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Rebî‘ilâhir sene [10]77. Şuhûdü’l-hâl: Ahmed Bey b. Mehmed, Abdi Bey b. Hüseyin, Şükrullah Bey b. Mustafa, Hasan Çelebi b. Ahmed, Mustafa Çelebi b. Ahmed.