Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 446 Hüküm no: 391 Orijinal metin no: [127a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Derviş Efendi’nin Soğan Ağa mahallesinde mülkü olan Küçükhamam’ın gelirini Haremeyn’deki müderris ve talebeye vakfetmiş olduğu Sâhibetü’l-hayrât merhûme Âişe bt. Derviş Efendi nâm Hatun tevliyyetini ve vech-i âtî üzere gallesin Medîne-i Münevvere ve Ravza-i Mutahhara harem-i muhtereminde dâru’l-hadîslik i‘tibârı ile müderrisîn olana şart ve vakf ettiği mahrûsa-i İstanbul’da Soğan Ağa mahallesinde vâki‘ ahâlîsine intimâ ile ta‘rîf ve tavsîfden müstağnî Küçük Hamâm demekle ma‘rûf hamâmın ber-mûceb-i şart-ı vâkıfe müderris olmağla mütevellîsi olup kendi vakfından olmak zu‘muyla zikr olunan hamâma vâzı‘ü’l-yed idiği tarîk-i şer‘î üzere sâbit olan fahrü’l-akrân Ömer Bey b. Mustafa nâm kimesne mahzarında takrîr-i da‘vâ edip merhûme-i mezbûre zikr olunan hamâm mülkü olmağla yirmi bir yıl mukaddem vakf-ı sahîh-i şer‘î ile vakf ve habs edip tescîl-i şer‘î ve teslîm ile’l-mütevellî ettikden sonra îcâr olunup hâsıl olan gallesinden Harem-i Muhterem’de vech-i muharrer üzere müderris olana yevmî yirmişer akçe ve talebesine onar akçe ve mütevellîsine üçer akçe ve tevliyyetini dahi müderris olana şart edip sıhhat ve lüzûmuna hükm olunmağla müddet-i medîd tasarruf olunur iken hâlâ mütevellî-i mezbûr tasarrufumuza mâni‘ olur, suâl olunup kasr-ı yedine tenbîh ile zikri sebk eden hamâm bana teslîm olunması matlûbumdur dedikde gıbbe’s-suâl mezbûr Ömer Bey cevâbında mütevellîsi olduğu vakf-ı mârru’z-zikrden olmak zu‘muyla vâzı‘ü’l-yed idiğin mukır, lâkin vech-i muharrer üzere vakfiyetini münkir olmağın müdde‘î-i mezbûrdan takrîrine mutâbık beyyine taleb olundukda udûl-ı Müslimîn ve fuhûl-ı muvahhidînden mefharu e[r]bâbi’t-tahrîr ve’l-kalem zübdetü ashâbi’l-mecd ve’r-rakam Cûşî Efendi demekle ma‘rûf Mehmed Efendi b. Ali ve mahalle-i merkūme imâmı zahrü’s-sulehâi’s-sâlikîn Mehmed Efendi b. Veli ve müezzini olan Ömer Halîfe b. Durmuş nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ vâkıfe-i merhûme-i mezbûre Âişe târîh-i mezkûrda mülkü olmak ile zikr olunan hamâmı vakf ve habs edip tescîl-i şer‘î ve teslîm ile’l-mütevellî ettikden sonra Harem-i Muhterem’de vech-i mübeyyen üzere hâsıl olan gallesinden yevmî yirmişer akçesin müderrisîne ve onar akçesini talebesine ve üçer akçesini mütevellîsine ve tevliyyetini müderris olana deyu şart edip sıhhat ve lüzûmuna hükm olundukdan sonra müddet-i medîde bu vech üzere tasarruf olundu, biz bu husûsa şâhidleriz, şehâdet dahi ederiz deyu edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a olmağın mûcebiyle tenbîh birle mâ-vaka‘a bi’t-taleb ketb olundu. Tahrîren fî-evâili şehri Recebi’l-mürecceb li-sene erba‘a ve selâsîn ve elf. Şühûdü’l-hâl: Abdülhalim Çelebi b. eş-Şeyh Mehmed el-müderris, İbrahim Çelebi b. Ebîbekir el-mülâzım, Mustafa Bey b. Yusuf el-bevvâbü’s-sultânî, Siyavuş b. Abdullah, Yusuf b. Abdullah.