Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 447 Hüküm no: 392 Orijinal metin no: [127a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı mütevellisi Ömer Ağa’nın vakfın câbîsi olan Ali’deki vakfın parasını istemesi Haremeyn-i Muhteremeyn Vakfı’na bi’l-fi‘il mütevellî olan Ömer Ağa b. Mustafa nâm cündî mahfil-i kazâda vakf-ı mezbûrun hâlâ câbîsi olan Ali b. ( ) nâm kimesne mahzarında üzerine takrîr-i da‘vâ edip mezbûr Ali zikr olunan vakfın akārâtı icâresinden târîh-i kitâb Muharremi gurresinden yine târîh-i kitâb şehri evâsıtına gelince cem‘ ve tahsîl ettiği meblağdan otuz altı bin üç yüz kırk akçe cânib-i vakfa teslîm etmeyip kendünün levâzımına harc u sarf etmekle el-ân zimmetinde bâkīdir, suâl olunup takrîr tahrîr ve meblağ-ı mezbûrun alıverilmesi matlûbumdur dedikde gıbbe’s-suâl mezbûr Ali cevâbında fi’l-vâki‘ şehr-i mezbûr gurresinden yine târîh-i kitâb şehri evâsıtına gelince cem‘an beş buçuk ay içinde akārât-ı mersûme icârâtından olup beynimizde ma‘lûm müste’cirler yedinden ahz u kabz ettiğimden sonra vech-i muharrer üzere kendi levâzımıma harc u sarf etmekle el-ân zimmetime edâ ve kazâsı vâcib vakfa otuz altı bin üç yüz kırk akçe deynim vardır deyu bi’t-tav‘i’s-sâf ikrâr u i‘tirâf etmeğin edâsına tenbîh birle mâ-vaka‘a bi’t-taleb ketb olundu. Hurrire fî-evâhiri şehri Cemâziyelâhire li-sene erba‘a ve selâsîn ve elf mine’l-hicreti’n-Nebeviyye aleyhi efdalü’t-tahiyye. Şühûdü’l-hâl: Mustafa Çelebi b. ( ) Kâtib-i vakıf, Mehmed Bey b. Hacı el-bevvâb, Mevlânâ İbrahim Efendi, Halil Efendi b. ( ) ve gayruhüm.