Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 448 Hüküm no: 393 Orijinal metin no: [127b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı mütevellisi Ömer Ağa’nın Kasab İvaz mahallesindeki vakıf evi Mehmed Subaşı b. Abdullah’a kiralaması Haremeyn-i Muhteremeyn Vakfı’na bi’l-fi‘il mütevellî olan Ömer Ağa b. Mustafa meclis-i şer‘de bâ‘isü’l-kitâb Mehmed Subaşı b. Abdullah mahzarında ikrâr-ı tâm ve takrîr-i kelâm edip mahmiye-i İstanbul’da Kasab İvaz mahallesinde sâkin iken bundan akdem fevt olan merkūm Sinan Bey’in vakfından olup evvelâ kendi nefsine ba‘dehâ ümm-i veledi Mülayim bt. Abdullah’a, ba‘dehâ evlâdına ve evlâd-ı evlâdına ve ba‘de’l-inkırâz gallesini Medîne-i Münevvere fukarâsına şart ettiği mahalle-i mezbûrede vâki‘ bir tarafı Solakbaşı Ali Ağa mülkü ve bir tarafı Mehmed Bey nâm cündî mülkü ve bir tarafı Osman Subaşı mülkü ve bir tarafı tarîk-i âm ile mahdûd olup büyût-ı müte‘addideyi müştemil olan menzil ber-mûceb-i şart-ı vâkıf meşrûtün-lehümden cümlesi münkarız olup tasarrufu zikri sebk eden fukarâya intikāl ettikde vech-i âtî üzere îcâr olunmak vakfa her vechile enfa‘ olduğu ecilden Sûk-ı Sultânî’de müzâyede olunup ragabât-ı nâs münkatı‘a oldukdan sonra râyicü’l-vakt sekiz bin akçeye mezbûr Mehmed Subaşı üzerinde karâr edip ziyâle ile tâlib-i âhar bulunmayıp semen-i mezbûr semen-i misli idiği mütehakkık olmağın meblağ-ı mezbûr sekiz bin akçe icâre-i mu‘accele ve ayda otuz akçe icâre-i müeccele ve menzil-i mezbûrun meremmetine ma‘rifet-i şer‘le mâlından harc u sarf ettiği akçe icâre-i mu‘accelesine mahsûb olmak üzere mezbûr Mehmed Subaşı’ya îcâr edip ol dahi vech-i muharrer üzere istîcâr ve kabûl eyledikden sonra meblağ-ı merkūm sekiz bin akçeyi tevliyyetim hasebiyle vakıf için mezbûr Mehmed Subaşı yedinden bi’t-tamâm ahz u kabz edip tasarrufuna izin verdim dedikde gıbbe’t-tasdîk [mâ-vaka‘a] bi’t-taleb ketb olundu. Fî-evâili Ramazân li-sene erba‘a ve selâsîn ve elf. Şühûdü’l-hâl: Ali Çelebi Acemzâde, Ahmed Çelebi er-râcil, Hayrullah b. ( ) el-kādî, Mehmed Bey b. Gazanfer, Mehmed Bey b. Mustafa el-bevvâb, İsmail Bey el-bevvâb.