Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 448 Hüküm no: 394 Orijinal metin no: [127b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı mütevellisi Ömer Ağa’nın Ferhat Paşa-yı Atik mahallesindeki vakıf evi el-Hac İbrahim b. Hüseyin’e kiralaması Mütevellî-i mezbûr Ömer Ağa mahfil-i kazâda sâhibü’l-kitâb el-Hâc İbrahim b. Hüseyin nâm kimesne mahzarında ikrâr ve takrîr-i kelâm edip sâhibetü’l-hayrât merhûme Zehra Hatun Vakfı’ndan olup mahrûsa-i İstanbul’da Ferhad Paşa-yı Atîk mahallesinde vâki‘ lede’l-ahâlî hudûdu ma‘lûm olmağla ta‘rîf ve tavsîfden müstağnî evvelâ süknâsını nefsine ba‘dehâ evlâdına, ba‘dehüm rebîbesi Emine bt. Sinan’a, ba‘dehâ kezâlik evlâdına ve evlâd-ı evlâdına, ba‘de’l-inkırâz rey‘ini Haremeyn fukarâsına şart ve vakf ettiği tûlen ve arzen bi-hesâb-ı şatrancî yedi yüz kırk altı zirâ‘ arsa üzerinde vâki‘ dâhiliyyesinde tahtânî iki beyti ve fevkānî bir beyti ve cüneyne ve müşterek kuyuyu ve kenîfi ve hâriciyyesinde bir ahır ve üstünde bir fevkānî beyti müştemil vakıf menzil meşrûtün-lehümden cümlesi münkarız olmağla vakfa intikāl edip lâkin vech-i âtî üzere îcâr etmek vakfa enfa‘ idiği sikāt haberi ile mütehakkık olucak, müzâyede olunup ragabât-ı nâs inkıtâ‘ından sonra râyic fi’l-vakt on dokuz bin akçede mezbûr el-Hâc İbrahim üzerinde karâr edip ziyâde ile tâlib-i âhar zuhûr etmeyip semen-i mezbûr semen-i misl idiği mukarrer olmağın meblağ-ı mezbûr on dokuz bin akçe icâre-i mu‘accele ve yevmî birer akçe müeccele ile mezkûr el-Hâc İbrahim’e îcâr edip ol dahi vech-i meşrûh üzere istîcâr ve kabûl ettikden sonra meblağ-ı sâlifü’z-zikr on dokuz bin akçeyi tevliyyetim hasebiyle bi’t-tamâm alıp kabz eyleyip tasarrufuna izin verdim dedikde gıbbe’t-tasdîk mâ-vaka‘a bi’t-taleb ketb olundu. Hurrire fî-evâili Ramazâni’l-mübârek li-sene erba‘a ve selâsîn ve elf. Şühûdü’l-hâl: Ali Çavuş b. Şa‘ban, el-Hâc Ali b. Receb, Veli b. Hüseyin, el-Hâc Halil b. Hüseyin, Mustafa Çelebi b. Abdüllatif, el-Hâc Pîrî b. el-Hâc Hasan, Mehmed b. Ömer.