Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 449 Hüküm no: 395 Orijinal metin no: [127b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı mütevellisi Ömer Ağa’nın Emin Bey mahallesindeki vakıf evi Hatice Hanım’a kiralaması Mütevellî-i mezbûr Ömer Ağa meclis-i şer‘de bâ‘isetü’l-kitâb Hadice bt. ( ) nâm Hatun tarafından tasdîk-i âti’l-beyâna vekîl olup vekâleti nehc-i şer‘î üzere sâbite olan Mehmed Bey b. Gazanfer mahzarında ikrâr ve takrîr-i kelâm edip vakf-ı mezbûrdan olup mahmiye-i İstanbul’da Emin Bey mahallesinde vâki‘ iki tarafı yine vakf-ı mezbûr ve iki tarafı tarîk-i âm ile mahdûd olup dört beyt-i ulvî ve iki beyt-i süflî ve ahırı müştemil menzili icâre-i mu‘accele ve ayda yetmiş beş akçe icâre-i müeccele ile mutasarrıf olup hâzır bi’l-meclis olan Solak Mehmed Bey b. Abdullah zevcesi müvekkile-i mezbûre Hadice’ye menzil-i mezbûrun hakk-ı tasarrufunu ferâğat edip cânib-i vakfa resm nâmına iki bin akçe vermeğin ben dahi tevliyyetim hasebiyle meblağ-ı mezbûru müvekkile-i mezbûre yedinden ahz edip tasarrufuna izin verdim dedikde mukırr-ı mezbûru ikrâr-ı meşrûhunda vekîl-i mersûm Mehmed Bey vicâhen tasdîk edicek, mâ-vaka‘a bi’t-taleb ketb olundu. Fî-evâili Ramazan sene erba‘a ve selâsîn ve elf. Şühûdü’l-hâl: Ali Çelebi, Ahmed Çelebi b. ( ) er-râcil, Mehmed Efendi b. ( ) el-kādî, Siyavuş b. Abdullah, Yusuf b. Abdullah, Ahmed Beşe b. Davud er-râcil, Ali Bey el-cündî, Mehmed Çelebi b. Hasan ve gayruhüm.