Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 450 Hüküm no: 396 Orijinal metin no: [128a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa mahallesindeki Haremeyn Vakfı’na ait evin kiracısı Mehmed Ağa b. Hamza’ya tamirat için izin verilmesi Mahmiye-i İstanbul’da Küçük Ayasofya kurbünde Hüseyin Ağa mahallesinde vâki‘ olup Haremeyn-i Şerîfeyn Vakfı’ndan olan lede’l-ahâlî ma‘lûmü’l-hudûd muhavvateyni müştemil olup muhavvata-i dâhiliyyesi üç beyt-i ulvî ve bir beyt-i süflî ve muhavvata-i hâriciyyesi iki beyt-i ulvî ve ahırı muhtevî menzili icâre-i mu‘accele ve müeccele ile mutasarrıf olan fahrü’l-akrân Mehmed Ağa b. Hamza nâm cündî meclis-i şer‘de takrîr-i kelâm edip menzil-i mezbûrun ekser mevâzi‘i harâb olup kābil-i süknâ olmamağla cânib-i şer‘-i şerîfden üzerine varılıp hakīkat-i hâl keşf ve tahrîr olundukdan sonra icâre-i mu‘acceleye mahsûb olmak üzere kendi mâlımdan bazı mevâzi‘i müceddeden binâ ve bazı mevâzi‘i ta‘mîre izin verilmesi matlûbumdur dedikde savb-ı şer‘-i mutahhardan Mevlânâ Ali Efendi ve hâssa mi‘mârlardan Üstâd Hasan Çelebi b. Hüseyin irsâl olunup anlar dahi zeyl-i kitâbda mastûrü’l-esâmî olup ebniye ve sukūfa vukūfu olan bî-garaz Müslimîn ile menzil-i mezbûra varıp nazar eylediklerinde fi’l-vâki‘ menzil-i mezbûrun muhavvata-i dâhiliyyesinde vâki‘ üç bâb beyt-i ulvî ve bir beyt-i süflî bir vechile kābil-i süknâ olmamağla müceddeden binâya ve muhavvata-i hâriciyyesinde vâki‘ iki beyt-i ulvî ve ahırı meremmete muhtâc olup ve yirmi bin akçe nıkz tahmîn ettiklerin mevlânâ-yı mezbûr mahallinde tahrîr, ba‘dehû meclis-i şer‘de haber verdikden sonra sâlifü’z-zikr iki beyt-i ulvî ve ahırı kendi mâlından meremmet ve sâirlerini müceddeden binâya izin verilip mâ-vaka‘a bi’t-taleb ketb olundu. Fî-evâili Ramazân li-sene erba‘a ve selâsîn ve elf. Şühûdü’l-hâl: Receb Efendi b. Hüseyin el-kâtib, Hüseyin Ağa b. Mehmed el-bevvâb, İsmail Çelebi b. Hüseyin, Mehmed Ağa eş-şehîr Beyzâde, Hüseyin Bey b. Osman el-cündî, Rıdvan Bey b. Abdulalh el-cündî, Hüseyin Bey Yoğurtçu, Tere Hasan el-müezzin, Halil Çelebi el-bevvâb, İbrahim Çelebi es-serrâc, Mehmed Bey el-Mısrî el-bevvâb, Mustafa Çavuş, Mustafa Ağa Kethüdâ-i Kassâbîn, Sinan Hoca el-müezzin, Mehmed Halîfe b. Nureddin el-müezzin, Ahmed Çelebi el-müezzin.