Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 450 Hüküm no: 397 Orijinal metin no: [128a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun bt. Hasan Kaptan’ın Yenimahalle’de Haremeyn Evkafı’na ait evi Eski Anadolu Kadıaskeri Musa Efendi’ye bırakması Kasaba-i Beşiktaş’da sâkine fahrü’l-muhadderât Havvâ Hatun bt. Hasan Kapudan tarafından ikrâr-ı âti’z-zikre vekîl olup mezbûreyi ma‘rifet-i şer‘iyye ile ârifân olan zahrü’l-emâsil ve’l-akrân Mustafa Efendi b. Hüsam Kapudan el-Emîn bi’d-defteri’s-sultânî sâbıkā ve fahrü’l-a‘yân Mehmed Çelebi b. Hasan Kapudan el-Müteferrika şehâdetleriyle şer‘an vekâleti sâbite olan fahrü’l-kitâb Mustafa Efendi b. Mehmed meclis-i şer‘de işbu sâhibü’l-kitâb a‘lemü ulemâi’l-izâm sâbıkā Anadolu Kadıaskeri olan Musa Efendi b. el-merhûm eş-Şeyh Şücaaddin Efendi tarafından tasdîk-i âti’l-beyâna vekîl olup zahrü’l-müderrisîn Mustafa Çelebi b. Mehmed ve Mehmed Efendi b. Mustafa şehâdetleriyle vekâleti sâbite olan fahrü’l-müderrisîni’l-kirâm Abdullah Efendi b. Mustafa Efendi mahzarında bi’t-tav‘ ikrâr u i‘tirâf edip müvekkile-i mezbûre Havvâ Hatun kasaba-i mezbûrede Yenimahalle’de vâki‘ bir tarafı Hasan Bey mülkü ve bir tarafı sâhil-i bahr ve tarafeyni tarîk-i âm ile mahdûd olup dâhiliyyesi fevkānî ve tahtânî büyût-ı müte‘addideyi ve eşcâr-ı müsmire ve üç bi’r-i mâyı müştemile hadîkayı ve hâriciyyesi on bâb büyût-ı cedîde ve fevkāniyeyi ve bir matbahı ve bir kenîfi ve tahtânî bir meclis ve bir mahtabı hâvî Haremeyn-i Muhteremeyn Evkāfı’ndan icâre-i mu‘accele ve beher sâl iki bin beş yüz akçe ecr-i misli olan icâre-i müeccele ile mutasarrıfe olduğu menzilin bi-cemî‘i’t-tevâbi‘ ve’l-levâhık hakk-ı tasarrufunu izn-i mütevellî ile müşârun-ileyh Musa Efendi’ye tefvîz edip ol dahi vech-i meşrûh üzere tefevvüz ve kabûl etmişdir dedikde vekîl-i mezbûru ikrâr-ı meşrûhunda vekîl-i diğer mersûm Abdullah Efendi vicâhen tasdîk edicek, mâ-hüve’l-vâkı‘ bi’t-taleb ketb olundu. Hurrire fî-evâhiri şehri Rebî‘i’l-âhir li-sene erba‘a ve selâsîn ve elf. Şühûdü’l-hâl: A‘lemü’l-ulemâ Ömer Efendi b. Mehmed el-Kādî be-Selanik sâbıkan, a‘lemü’l-ulemâ Sıdkı Efendi b. İbrahim el-Kādî be-Manisa sâbıkan, fahrü’l-müderrisîn es-Seyyid Ahmed Efendi b. es-Seyyid İvaz, fahrü’l-etıbbâ Yusuf Efendi b. Abdurrahman et-tabîbü’s-sultânî, fahrü’l-müderrisîn Mustafa Çelebi b. es-Seyyid Mehmed, fahrü’l-kuzât Abdülaziz Efendi el-kādî, Perviz Ağa b. Abdullah el-müteferrika, Ca‘fer Bey b. Abdullah el-kehhâlü’s-sultânî ve gayruhüm.