Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 451 Hüküm no: 398 Orijinal metin no: [128a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un Kazasker Musa Efendi’ye bıraktığı evin parasını aldığı Mahrûsa-i Galata’ya tâbi‘ kasaba-i Beşiktaş’da sâkine fahrü’l-muhadderât Havvâ Hatun bt. Hasan Kapudan tarafından husûs-ı âti’z-zikre vekîl olup mezbûreyi ma‘rifet-i şer‘iyye ile ârifân olan fahrü’l-emâsil ve’l-akrân Mustafa Efendi b. Hüsam Kapudan el-Emîn bi’d-defteri’s-sultânî sâbıkā ve zahrü’l-a‘yân Mehmed Çelebi b. Hasan Kapudan el-Müteferrika şehâdetleriyle vekâleti sâbite olan fahrü’l-kitâb Mustafa Efendi b. Mehmed meclis-i şer‘de işbu sâhibü’l-kitâb a‘lemü’l-ulemâi’l-izâm sâbıkā Anadolu Kadıaskeri olan Musa Efendi b. el-merhûm eş-Şeyh Şücaaddin Efendi tarafından tasdîk-i âti’z-zikre vekîl olup Mustafa Çelebi b. Mehmed el-Müderris ve Mehmed Efendi b. Mustafa şehâdetleriyle şer‘an vekâleti sâbite olan fahrü’l-müderrisîni’l-kirâm Abdullah Efendi b. el-merhûm Mustafa Efendi mahzarında ikrâr u i‘tirâf edip müvekkile-i merkūme Havvâ Hatun kasaba-i mezbûrede Yenimahalle’de vâki‘ etrâf-ı erba‘ası Hasan Bey mülkü ve sâhil-i bahr ve tarîk-i âm ile mahdûd olup dâhiliyyesi fevkānî büyût-ı müte‘addideyi ve müte‘addid bi’r-i mâyı ve eşcâr-ı müsmireyi müştemil hadîkayı ve hâriciyyesi on bâb büyût-ı cedîd [ve] fevkāniyeyi ve bir matbah ve bir kenîfi ve tahtânî bir meclisi ve bir mahtabı hâvî olup Haremeyn-i Şerîfeyn Evkāfı’ndan olup bundan akdem iki yüz yirmi beş bin akçe icâre-i mu‘accele ve beher sene ecr-i misli olan iki bin beş yüz akçe ücret-i müeccele ile Haremeyn mütevellîsi olan Hüseyin nâm kimesneden istîcâr edip tasarrufunda olan menzilin hakk-ı tasarrufunu bi’l-fi‘il vakf-ı mezbûr mütevellîsi olan fahrü’l-akrân [128b] Ömer Bey b. Mustafa ma‘rifetiyle müşârun-ileyh Musa Efendi’ye kâmilü’l-vezn sahîhü’l-ayâr iki bin altı yüz altmış altı şerîfi sikke-i haseneye tefvîz etmişdi, hâlâ mukābele-i tefvîzden olan meblağ-ı mârru’z-zikr iki bin altı yüz altmış altı sikke-i haseneyi vekâlet-i mahkiyem hasebiyle müşârun-ileyh efendi hazretlerinin yedinden bi’t-tamâm alıp kabz eyledim, ba‘de’l-yevm menzil-i mezbûru mûmâ-ileyh efendi hazretleri sâir emsâli olan evkāt gibi keyfe mâ yeşâ mutasarrıf olsun dedikde gıbbe’t-tasdîk vicâhen bi’t-taleb ketb olundu. Hurrire fi’t-târîhi’l-mezbûr. Şühûdü’l-hâl: es-Sâbıkūn.