Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 452 Hüküm no: 399 Orijinal metin no: [128b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı mütevellisi Ömer Bey’in Baba Hasan İlmî mahallesindeki vakıf evi kiralamada hile yapan Ebubekir Çelebi’den zararı tahsil etmesi Haremeyn Vakfı’na bi’l-fi‘il mütevellî olan Ömer Bey b. Mustafa nâm cündî meclis-i şer‘de mahmiye-i İstanbul’da Baba Hasan İlmî mahallesinde sâkin olup menzil-i âti’l-beyâna vâzı‘ü’l-yed idiği tarîk-i şer‘î üzere sâbit olan Ebîbekir Çelebi b. Abdullah mahzarında üzerine takrîr-i da‘vâ edip mahalle-i mezbûrede vâki‘ sâhibü’l-hayrât merhûm ( ) vakfından olup bir tarafı Mustafa Bey Vakfı ve bir tarafı Karagöz Mescidi imâmına meşrût olan vakıf menzil ve bir tarafı mezbûr Ebîbekir Çelebi mülkü ve bir tarafı Mustafa Çelebi el-Yesârî mülkü ile mahdûd şurût-ı mu‘ayyene-i mu‘tebere ile vakf olan menzil bundan akdem ber-mûceb-i şart-ı vâkıf ta‘yîn olunan şurûtun intihâsıyla galle ve tasarrufu Haremeyn fukarâsına intikāl ettikde müzâyede olunup ba‘de ragabâti’n-nâs ecr-i misli olan yirmi dört bin akçede mezbûr Ebîbekir üzerinde karâr edip ol dahi meblağ-ı merkūm ile istîcâr ve kabûl etmiş iken dört bin akçesin mütevellî-i sâbık Veli Bey’e edâ ettikden sonra mu‘accelesi gabn-ı fâhişle dört bin akçe olmak üzere mütevellî-i mezbûr Veli Bey’den bir tarîkle yedine temessük alıp vakfa gadr etmişdir, suâl olunup takrîri tahrîr olunması matlûbumdur dedikde gıbbe’s-suâl mezkûr Ebîbekir Çelebi cevâbında fi’l-vâki‘ menzil-i sâlifü’l-beyân vech-i muharrer üzere müzâyede olundukda yirmi dört bin akçede benim üzerimde karâr etmeğin ben dahi ol kadar meblağa istîcâr ve kabûl etmişdim, lâkin mütevellî-i mezbûra dört bin akçesin teslîm ettiğimden sonra bâkīsinden ferâğ edip îcârı mutazammın yedime temessük verdi, el-ân ecr-i mislinden bâkī kalan yirmi bin akçeye tuta mahalle-i mezbûrede vâki‘ bir tarafı el-Hâc Hüseyin mülkü ve bir tarafı Mehmed Bey el-Bevvâbü’s-sultânî mülkü ve bir tarafı Kaytas Bey b. Abdullah mülkü ve bir tarafı tarîk-i âm ile mahdûd olup Ümmühan nâm Hatundan yirmi iki bin akçeye iştirâ ettiğim menzili vakıf için müdde‘î-i mezbûra teslîm edesin deyu ikrâr etmeğin ecr-i misli olan meblağ-ı merkūm yirmi bin akçeyi teslîme tenbîh birle mâ-vaka‘a bi’t-taleb ketb olundu. Fî-evâhiri Ramazân sene [10]34 Şühûdü’l-hâl: Abdülhalim Çelebi el-müderris, Mirza Bey b. Kemal el-bevvâb, Mehmed Çelebi el-hammâmî, Hüseyin Çelebi b. Abdullah er-râcil, Ahmed Çelebi er-râcil, Mehmed Efendi el-kādî, Mustafa Bey el-bevvâb.