Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 98 Hüküm no: 16 Orijinal metin no: [2b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia bt. Musa’nın, boşandığı kocası Abdullah Çelebi’den hakkını aldığı Mahmiye-i İstanbul’da Deniz Abdal mahallesi sâkinelerinden Râbia bt. Musa nâm hâtun meclis-i şer‘-i şerîfde zevci dâhilün-bihâsı bâ‘isü’l-kitâb Abdullah Çelebi b. Hasan mahzarında ikrâr ve takrîr-i kelâm edip mezbûr Abdullah Çelebi ile zimmetinde mütekarrir ma‘kūdun-aleyh olan iki bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre muhâla‘a-i sahîha-i şer‘iyye ile muhâla‘a edip ol dahi kabûl eyledikden sonra mezbûr Abdullah Çelebi’nin bundan akdem vefât eden muhâli‘im ve mûrisim Ali Ağa b. Derviş’in muhallefâtından benim için emrim ile kabz ettiği altmış yedi bin akçeden bana teslîm eylediği yirmi dört bin akçeden mâ‘adâ [3a] bi gayrı hakkın mesârifine sarf ettiği kırk üç bin akçeden ve cihet-i karzdan zimmetinde hakkım olan on bin akçeden mezbûr Abdullah Çelebi’nin ve târih-i kitâba gelince beynimizde cârî olan ahz u i‘tâ ve mu‘âmelât-ı şettâya müte‘allika âmme-i hukūk-ı ma‘lûme ve mechûle da‘vâsından ve hukūk-ı zevciyyete müte‘allika da‘vâdan ben mezbûr Abdullah Çelebi’nin ve mezbûr Abdullah Çelebi dahi benim zimmetimi ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-ışrîn min Rebî‘ilâhir li sene seb‘a ve seb‘în ve elf. Şuhûdü’l-hâl: Derviş Çelebi b. Ali, Osman Çelebi [b.] Mehmed, Şaban Çelebi [b.] Musli, Osman Çelebi el-Hallâk, İbrahim Efendi el-İmâm, Mehmed Çelebi el-Müezzin, Hasan Çelebi [b.] Ahmed, Mehmed Çelebi [b.] İbrahim