Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 453 Hüküm no: 400 Orijinal metin no: [128b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mere Hüseyin Paşa’nın sağken Üsküblü mahallesinde tasarrufundaki vakıf evi oğlu İsmail Bey’e ferağ etmiş olduğu Mütevellî-i mezbûr mahfil-i kazâda sâbıkā vezîriazam ve maktûl olan Mere Hüseyin Paşa’nın sulbî oğlu İsmail Bey tarafından ikrâr-ı âti’z-zikri tasdîka vekîl olup nehc-i mu‘teber üzere vekâleti sâbite olan Mehmed Bey b. Gazanfer mahzarında ikrâr ve takrîr-i kelâm edip evkāf-ı mezbûreden olup mahmiye-i İstanbul’da Ayasofya-i Kebîr kurbünde Üsküblü mahallesinde vâki‘ icâre-i mu‘accele ve ayda yüz seksen akçe ücret-i müeccele ile merhûm-ı mezbûrun taht-ı tasarrufunda olan ma‘lûmü’l-hudûd menzili bundan akdem bin otuz bir senesinin Şa‘bân’ında vakf-ı mezbûrun mütevellîsi olan Veli Bey zamânında maktûl-ı mezbûr müvekkil-i mûmâ-ileyhe fâriğ olup temessük dahi almış iken temessüğün zâyi‘ edip hâlâ temessük taleb eyledikde fi’l-vâki‘ maktûl-ı mezbûrun vech-i muharrer üzere müvekkil-i mûmâ-ileyhe ferâğı Defter-i Vakıf’da mukayyed olmağın ben dahi temessük verip tasarrufuna izin verdim dedikde gıbbe’t-tasdîk bi’t-taleb ketb olundu. Fî-evâsıtı Ramazâni’l-mübârek li-sene erba‘a ve selâsîn ve elf. Şühûdü’l-hâl: Halil Çelebi b. Mahmud el-müderris, Mustafa Bey b. Yusuf el-bevvâb, Hasan Çelebi b. Hüseyin el-mi‘mâr, Abdülhalim Çelebi b. Mehmed el-müderris.