Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 454 Hüküm no: 402 Orijinal metin no: [129a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elvanzâde mahallesindeki Dilber Hatun’un vakfettiği ve Haremeyn Vakfı’na intikal eden evin Hacı Kasım b. Cuma’ya kiraya verilmesi Mahmiye-i İstanbul’da Haremeyn-i Şerîfeyn Vakfı’na bi’l-fi‘il mütevellî olan fahrü’l-akrân Ömer Ağa b. Mustafa meclis-i şer‘-i şerîf-i vâcibü’t-teşrîfde bâ‘isü hâze’l-kitâb el-Hâc Kasım b. Cuma mahzarında ikrâr ve takrîr-i kelâm edip mahmiye-i mezbûrede Azebler Hamâmı kurbünde Elvanzâde mahallesinde sâkine iken bundan akdem müteveffât olan merhûme el-Hâcce Dilber Hatun bt. Abdullah hâl-i hayâtında vakfiye-i ma‘mûlün-bihâsında mastûr olduğu üzere silk-i mülkünde münselik mahalle-i mezbûrede vâki‘ bir tarafı el-Hâc Salim mülkü ve bir tarafı vakf-ı mezbûr ve bir tarafı mülkü ve bir tarafı tarîk-i hâs ile mahdûd olup beyt-i süflî ve bir beyt-i ulvî ve gurfe ve bi’r-i mâ ve müşterek kenîfi ve muhavvatayı müştemil menzilini vakf ve hasb edi[p] süknâsını evvelâ kendi nefsine, ba‘dehâ el-Hâc Mustafa nâm kimesneye, ba‘dehû evlâdına ve evlâd-ı evlâdına, ba‘de’l-inkırâz hâsıl olan gallesi menzil-i mezbûrun lâzım olan meremmetine sarf olunup ziyâdesi Medîne-i Münevvere fukarâsına irsâl oluna deyu şart etmişdi, lâkin meşrûtün-lehümden cümlesi münkarız olmağla menzil-i mezbûrun gallesi cânib-i vakf-ı mezbûra âid oldukda vech-i âtî üzere menzil-i mezbûru îcâr her vechile vakfa enfa‘ olduğu sikāt ihbârıyla mütehakkık oldukdan sonra Sûk-ı Sultânî’de kirâren müzâyede olunup ba‘de inkıtâ‘-ı ragabât-ı nâs mezbûr el-Hâc Kasım üzerinde yevmî bir akçe icâre-i müeccele ile râyic fi’l-vakt altı bin akçede karâr edip ziyâde ile tâlib-i âhar zuhûr etmeyip ve meblağ-ı merkūm ecr-i misli idiği mütebeyyin olmağın ben dahi tevliyetim hasebiyle menzil-i mezbûru meblağ-ı merkūm altı bin akçe icâre-i mu‘accele ve yevmî bir akçe icâre-i müeccele ile mersûm el-Hâc Kasım’a îcâr edip ol dahi minvâl-i muharrer üzere istîcâr ve kabûl eyledikden sonra meblağ-ı merkūm altı bin akçeyi vakf için mezbûr el-Hâc Kasım yedinden bi’t-tamâm ahz u kabz edip tasarrufuna izin verdim dedikde gıbbe’t-tasdîk bi’t-taleb ketb olundu. Tahrîren fî-evâhiri Şevvâli’l-mükerrem li-sene erba‘a ve selâsîn ve elf. Şühûdü’l-hâl: Sinan Efendi b. Ali el-imâm, el-Hâc Selim b. Ayyar, Ebuzeyd b. Ayyar el-Hâc Rıdvan b. Abdullah, el-Hâc Mehmed b. Ebû Mesud.