Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 455 Hüküm no: 403 Orijinal metin no: [129b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mehmed’in Haremeyn Vakfı’ndan istiğlâl yoluyla ödünç aldığı Mahmiye-i Kostantıniyye mahallâtından Canbâziye mahallesinde sâkine Emine bt. Mehmed meclis-i şer‘-i şerîfe hâzıra olup işbu akdin kendisinden sudûruna kadar silk-i mülk-i sahîhinde ve taht-ı tasarrufunda bulundurduğu, mahalle-i mezbûrede vâki‘, bir tarafından Mehmed Çelebi mülkü, bir tarafından Rahime Hatun mülkü, bir tarafından Kasabbaşı diye ma‘rûf kimse mülkü, bir tarafından tarîk-ı âm ile mahdûd cemî‘ menzilini cümle tevâbi‘ ve levâhıkıyla râyicü’l-vakt üç bin dört yüz akçe semen-i mu‘ayyen-i makbûzla Haremeyn-i Şerîfeyn Vakfı mütevellîsi hâfız-ı hâze’l-kitâb Ömer Ağa b. Mustafa’ya bey‘ ettiğini ikrâr ve i‘tirâf eyledi. Mütevellî-yi mezbûr dahi vakf-ı mezkûr mâlıyla ve istiğlâl maksadıyla iştirâ eyledi. Bâyi‘-i mezbûrun istîcârı üzere müşterî-i merkūm menzil-i mesfûru zeylde mezkûr tarihden bir sene tamâmına râyicü’l-vakt üç yüz kırk akçe ücret-i kirâ ile icâreye verdi. Vâki‘ ikrâr mütevellî-yi mezbûr tarafından vicâhen ve şifâhen tasdîk edildi. Sonra mahalle-i mezbûre sükkânından İbrahim b. Abdülkerim ve Mehmed Beşe b. Mustafa er-râcil nâm kimselerin her biri menzil-i mezbûrun derkine ve ücret-i kirâya îcâb ve kabûlü hâviye kefâletle kefîl oldu. Cerâ zâlike ve hurrire fi’l-yevmi’s-sâni aşara min-Zilka‘deti’ş-şerîfe li-sene erba‘a ve selâsîn ve elf. Şühûdü’l-hâl: Mehmed Bey b. Mehmed eş-şehîr bi-Fehimzâde, Mehmed Bey b. Ali el-cündî, Mehmed Efendi kâtib-i yeniçeriyân, Ahmed Beşe er-râcil, Mehmed Bey el-câbî