Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 456 Hüküm no: 404 Orijinal metin no: [129b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı mütevellisi Ömer Ağa’nın borcunu ödeyen Emine bt. Mehmed’in rehnini çözmesi Haremeyn-i Şerîfeyn Evkāfı’na bi’l-fi‘il mütevellî olan Ömer Ağa b. Mustafa nâm cündî meclis-i şer‘de bâ‘isetü’l-kitâb Emine bt. Mehmed mahzarında ikrâr-ı tâm ve takrîr-i kelâm edip altın iki yüz elliye râyic iken evkāf-ı mezbûre mâlından mütevellî-i sâbık Ali Çelebi yedinden mu‘âmele-i şer‘iyye ile yirmi bin akçe olmak üzere seksen [altın] alıp mukābelesinde mahmiye-i İstanbul mahallâtından Koruk mahallesinde vâki‘ lede’l-ahâlî ma‘lûmü’l-hudûd mülk menzilini mezbûr Ali Çelebi yedine rehn vaz‘ ve teslîm edip ol dahi irtihân ve kabz etmiş idi, el-hâletü hâzihî zikr olunan seksen altın ve mu‘âmele nâmına bin beş yüz akçeyi mezbûr Emine yedinden bi’t-tamâm ahz u kabz edip menzil-i mezbûru rehniyetden fek eyledim dedikde gıbbe’t-tasdîk bi’t-taleb ketb olundu. Fî-evâsıtı Zilka‘deti’ş-şerîfe li-sene erba‘a ve selâsîn ve elf. Şühûdü’l-hâl: Mehmed Beşe b. Mustafa er-râcil, İbrahim b. Abdülkerim, Mehmed Bey b. Gazanfer el-câbî, Ali Çelebi b. Pîrî el-câbî, Mustafa b. Yusuf el-bevvâbü’s-sultânî.