Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 456 Hüküm no: 405 Orijinal metin no: [129b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı mütevellisi Ömer Ağa’nın Kasımpaşa Çatma Mescid mahallesindeki Fatma Hatun bt. Abdullah’ın vakfettiği evi Ahmed Efendi b. Kemaleddin’e kiraya vermesi Haremeyn-i Şerîfeyn Evkāfı’na bi’l-fi‘il mütevellî olan Ömer Ağa b. Mustafa nâm cündî meclis-i şer‘-i şerîfde bâ‘isü’l-kitâb Ahmed Efendi b. Kemaleddin mahzarında ikrâr ve takrîr-i kelâm edip mahmiye-i Galata’ya tâbi‘ kasaba-i Kasım Paşa mahallâtından Çatma Mescid mahallesi sâkinelerinden iken bundan akdem fevt olan merhûme Fâtıma Hatun bt. Abdullah hâl-i hayâtında mahalle-i mezbûrede vâki‘ bir tarafı Hasan b. ( ) mülkü ve bir tarafı Saâdet Hatun bt. Abdullah mülkü ve bir tarafı tarîk ve bir tarafı tarîk-i hâs ile mahdûd olup iki beyt-i ulvî ve bir sofa ve bir dahlîz ve bir beyt-i süflî ve bir mahtab ve iki cüneyne ve bir kenîf ve bi’r-i mâyı müştemil mülk menzilini vakf ve habs edip süknâsını evvelâ kendi nefsine, ba‘dehâ zevci Süleyman b. Abdullah ile Ramazan b. Abdullah nâm kimesnelere, ba‘dehümâ evlâdlarına, ba‘de’l-inkırâz Medîne-i Münevvere fukarâsına şart etmişdi, hâlâ meşrûtün-lehüm bi’l-külliye münkarız olup galle ve tasarrufu cânib-i vakfa âid oldukda vech-i âtî üzere îcâr her vechile vakfa enfa‘ olduğu sikāt ihbârıyla mütehakkık oldukdan sonra Sûk-ı Sultânî’de kirâren müzâyede olunup ba‘de inkıtâ‘-ı ragabât-ı nâs mezbûr Ahmed Efendi üzerinde ayda yirmi akçe icâre-i müeccele ve râyicü’l-vakt üç bin beş yüz akçe ücret-i mu‘accelede karâr edip ziyâde ile tâlib-i âhar zuhûr etmeyip ve meblağ-ı mezbûr ecr-i misli idiği mütebeyyin olmağın ben dahi tevliyetim hasebiyle menzil-i mezbûru üç bin beş yüz akçe icâre-i mu‘accele ve ayda yirmi akçe icâre-i müeccele ile mezbûr Ahmed Efendi’ye îcâr edip ol dahi minvâl-i muharrer üzere istîcâr ve kabûl ettikden sonra meblağ-ı mezbûr üç bin beş yüz akçeyi bi’t-tamâm yedinden alıp tasarrufuna izin verdim dedikde gıbbe’t-tasdîk bi’t-taleb ketb olundu. Fî-evâhiri Zilka‘deti’ş-şerîfe li-sene erba‘a ve selâsîn ve elf. Şühûdü’l-hâl: Ali Efendi el-kādî, Halil Efendi b. Mahmud el-müderris, Mustafa Bey b. Yusuf el-bevvâb, Mehmed Bey b. Gazanfer el-câbî, Ali Bey b. Pîrî el-câbî.