Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 457 Hüküm no: 406 Orijinal metin no: [129b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı mütevellisi Ömer Ağa’nın Canbaziye mahallesinden Emine bt. Mehmed’in verdiği meblağın yeni rayic üzerinden hesaplanması Târîh-i kitâb Safer’inin beşinci günü fermân-ı âlî ile kesik akçenin te‘âtîsi emr-i sultânî ile memnû‘ ve altın yüz yirmiden ziyâdeye râyic olması merfû‘ olmağla mahmiye-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Ömer Ağa b. Mustafa nâm cündî meclis-i şer‘de takrîr-i kelâm edip mahmiye-i mezbûrede Canbaziye mahallesinde sâkine Emine bt. Mehmed nâm hatun altın iki yüz elli akçeye râyic iken benden evvel evkāf-ı mezbûreye mütevellî olan Ali Çelebi b. ( ) yirmi bin akçe olmak üzere zimem ettiği seksen altını ahz ettiğimde cedîd akçe hesâbınca dokuz bin altı yüz akçe olmağın geri tahrîr olunması matlûbumdur dedikde meblağ-ı merkūm seksen altını meclis-i şer‘a ihzâr edip müşâhede olundukda fi’l-hakīka sâbıku’z-zikr altın vakfın olup hîle ve hud‘a ve âhardan halt etmediğine hüddâm-ı vakfın sikātı ihbârından mâ‘adâ half billâhi te‘âlâ etmekle mütehakkık oldukdan sonra hâlâ râyic olduğu üzere dokuz bin altı yüz akçe ve hesâb-ı mesfûr üzere geri on bin dört yüz akçe olmağın [130a] vâki‘ hâl hıfzan li’l-makāl ketb olundu. Tahrîren fî-evâsıtı Zilka‘de li-sene erba‘a ve selâsîn ve elf. Şühûdü’l-hâl: Ali Bey b. Mehmed el-cündî, Mehmed Bey b. Ali el-cündî, İbrahim Bey el-cündî, Mahmud Efendi Kâtib-i Yeniçeriyân, Ahmed Beşe b. ( ) er-râcil.