Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 458 Hüküm no: 407 Orijinal metin no: [130a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daye Hatun mahallesinden Hızır Ağa’nın menzilini vakfettiğinin anlaşıldığı El-emru kemâ hurrire fîhî, nemakahü’l-fakīr Abdurrahim b. Mehmed el-müvellâ bi-muhâsebeti’l-evkāf bi-Kostantıniyyeti’l-mahmiye -ufiye anhû- Yu‘teberu mâ-fîhî inde sübûtihî şer‘an harrerehü’l-fakīr Ebû Said Mehmed b. Esad el-Kādî bi-medîneti Kostantıniyyeti’l-mahmiye -ufiye anhümâ- Yu‘melü bimâ fîhî inde sübûti mazmûnihî şer‘an harrerehü’l-fakīr Seyyid Mehmed b. Seyyid Mehmed el-Habeşî el-kādîasker-i Rumeli -ufiye anhümâ- Vakf-ı âti’l-beyâna kıbel-i şer‘den mansûb mütevellî olup da‘vâya me’zûn olan işbu hâfızü’l-kitâb Yusuf Bey b. Hüseyin mahfil-i kazâda mahmiye-i Kostantıniyye’de vâki‘ Daye Hatun mahallesinde sâkin iken bundan akdem vefât eden merhûm Hızır Ağa b. Abdullah’ın verâseti zevce-i metrûkesi Belkıs Hatun bt. Abdullah’a ve sulbî kebîr oğlu Sefer Ağa’ya münhasıra olup menzil-i âti’z-zikre vâzı‘ü’l-yed oldukları şer‘an mütehakkık oldukdan sonra mahzarlarında üzerlerine takrîr-i da‘vâ edip müteveffâ-yı mezbûr Hızır Ağa hâl-i sıhhatinde târîh-i kitâbdan iki sene mukaddem mahalle-i mezbûrede vâki‘ bir tarafdan Solak Yusuf Bey mülkü ve bir tarafdan Rıdvan Kethüdâ mülkü ve bir tarafdan Dârü’l-hadîs ve bir tarafdan tarîkle mahdûd muhavvata-i dâhiliyyesinin tabaka-i ulyâsında dört bâb oda, ânın fevkinde bir köşkü ve tabaka-i vustâsında beş bâb odayı ve tabaka-i süflâsında bir ıstablı ve matbahı ve iki kubbeli hamâm ve cüneyneyi ve iki kenîf ve muhavvata-i hâriciyyesinin tabaka-i ulyâsında üç bâb oda ve iki sofa ve vustâsında dört bâb oda ve süflâsında bir ahır ve iki kenîf ve cüneyneyi müştemil olan mülk menzilini cümle-i tevâbi‘ ve levâhıkıyla hasbeten lillâhi vakf edip süknâsını mâdem ki kayd-ı hayâtda ola kendi nefsine, ba‘de vefâtihî evlâdına ve evlâd-ı evlâdına ba‘de’l-inkırâz utekāya, ba‘de’l-inkırâz Medîne-i Münevvere -sallallâhü te‘âlâ alâ-münevvirihâ- fukarâsına şart ve ta‘yîn eylemişdir. Menzil-i mahdûd-ı mezbûr minvâl-i meşrûh üzere vakf olmuşken merkūme Belkıs ve mezbûr Sefer Ağa mülkiyyet üzere zabt u tasarruf ederler, suâl olunup ihkāk-ı hak olunmak matlûbumdur dedikde gıbbe’s-suâl ve akībe’l-inkâr mütevellî-i mezbûr Yusuf Bey’den takrîrine muvâfık beyyine taleb olundukda Ali Çavuş b. Pervane ve Hüseyin Bey b. Abdullah ve Ali Bey b. ( ) ve Mehmed Bey [b.] Hasan nâm kimesneler li-ecli’ş-şehâde mahfil-i kazâya hâzırûn olup gıbbe’l-istişhâd fi’l-vâki‘ müteveffâ-yı mezbûr Hızır Ağa bizim huzûrumuzda târîh-i kitâbdan iki sene mukaddem hâl-i sıhhatinde menzil-i mahdûd-ı mezkûru hasbeten lillâh vakf ve habs edip süknâsını evvelâ kendi nefsine, ba‘de vefâtihî evlâdına, ba‘de’l-inkırâz utekāsına, ba‘dehû Medîne-i Münevvere fukarâsına şart ve ta‘yîn eyledi, biz bu husûsa şâhidleriz, şehâdet dahi ederiz deyu edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a olup mûcebiyle hükm birle mâ-vaka‘a bi’t-taleb ketb olundu. Hurrire fî-evâhiri Şevvâli’l-mükerrem li-sene erba‘a ve selâsîn ve elf. Şühûdü’l-hâl: Mehmed Çelebi b. ( ) el-kâtib, Murad b. Mehmed el-Muhzır, Halil Çelebi el-imâm, Mustafa Çelebi el-müezzin, Hasan Ağa b. ( ) ez-zevvâk, Mehmed Ağa el-müteferrika. Zeyd-i müteveffânın bir menzilini hâl-i hayâtında evlâdına ve evlâd-ı evlâdına ve ba‘de’l-inkırâz Medîne-i Münevvere fukarâsına gallesi verile deyu şart ettiği veresesi muvâcehelerinde isbât olup hâkimü’ş-şer‘ dahi sıhhat-i vakf ve lüzûmuna hükm ettikden sonra utekāsından Amr ve Bekir ve Bişr gallesi bize dahi kendi evlâdı inkırâzından sonra meşrûtadır deyu izn-i hâkim ile da‘vâ ve isbât etseler şer‘an mesmû‘a olur mu? El-cevâb: Olur. Ketebehû Yahya el-fakīr -ufiye anhû-