Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 459 Hüküm no: 408 Orijinal metin no: [130a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı mütevellisi Ömer Ağa’nın önceki mütevelliden teslim aldığı vakfın paralarını rayic üzere hesaplatması Târîh-i kitâb Safer’inin beşinci günü emr-i sultânî ile kesik akçenin te‘âtîsi memnû‘ ve altın yüz yirmişerden ve guruş seksener akçeden ve Osmânî üç akçeden ziyâdeye râyic olması merfû‘ olmağla Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Ömer Ağa b. Mustafa nâm cündî meclis-i şer‘-i şerîfde takrîr-i kelâm edip vakf-ı mezbûra bundan evvel mütevellî olan Ali Çelebi vakf-ı mezbûr mâlından altın iki şer‘ yüz yetmişer akçe ve guruş yüz yetmiş akçe ve Osmânî onar akçeye cem‘an on dört bin akçe olmak üzere bana teslîm ettiği elli bir altın ve bir kâmil guruş ve altı Osmânî’nin geri tahrîr olunması matlûbumdur deyu meblağ-ı merkūm elli bir altın ve bir guruş ve altı aded Osmânî’yi meclis-i şer‘a ihzâr edip müşâhede olundukda fi’l-hakīka sâbıku’z-zikr altın ve guruş ve Osmânî vakfın olup hîle ve hud‘a ve âhardan halt etmediğine hüddâm-ı vakfın sikāt ihbârından mâ‘adâ half billâhi te‘âlâ etmekle mütehakkık oldukdan sonra hâlâ râyic olduğu üzere altı bin iki yüz on sekiz akçe ve hesâb-ı mesfûr üzere geri yedi bin yedi yüz seksen iki akçe olmağın vâki‘ hâl hıfzan li’l-makāl ketb olundu. Tahrîren fî-evâhiri Zilka‘de li-sene erba‘a ve selâsîn ve elf. Şühûdü’l-hâl: Ali Bey b. Mehmed el-cündî, Mehmed Bey b. Ali el-cündî, İbrahim Bey el-cündî, Mahmud Efendi Kâtib-i Yeniçeriyân, Ahmed Beşe er-râcil, Mustafa Bey b. Yusuf el-bevvâb.